No.2301/2021-2022

Aizawl, 22nd September, 2021 : Rotary Club of Aizawl chuan vawiin khan Health Minister Dr. R. Lalthangliana chu a pisa ah hmuin COVID-19 hripui dona atana hman turin Oxygen Concentrator 135 an hlan.

Health Minister Dr. R. Lalthangliana chuan Mizoramin hripui nasa taka kan tawrh laia kan mamawh tak a hun taka Rotary Club of Aizawl ten an pe chu thinlung takin a lawm tih a sawi a, Mizoram mipuite leh Health Department aiawhin lawm takin ka dawng a ni, a ti a. Rotary Club of Aizawl mai bakah an hmunpui lama an hotute leh an thawhpui zawng zawngte chungah lawmthu a sawi bawk a ni.

Health Minister chuan thenawm ram a buai vanga nunau raltlan tam tak Mizoramah an rawn tlanchhia tih sawiin an zingah hian naupang leh tar chaklo tak takte pawh an tel a, fur lai a ni a, Tiau lui a len vanglai tak lehnghalin an thawhnaw hak lai nen thlabar taka rawn tlanchhia an nih avangin chhawmdawl an mamawh em em a, an hriselna dinhmun endika vil turin medical team a tirh thu sawiin, Mizoram Commission for Protection of Child Rights pawh an chairman Dr. C. Lalsangzuala hovin raltlan naupangte dinhmun endika a tul anga hma la turin an thawk chhuak dawn tih a sawi bawk a ni.

Health Minister chuan Rotary Club tangkaizia a hriat thu sawiin, aizawl main i lo, Mizoram district dangah pawh inzarpharh thei se a duhsak takzet tih a sawi a, Rotary Club hi mi hausa leh changkangte chauh telna tur ni a ngaihna a awma a hriat thu sawiin, mi zawng zawng huap a ni tih kan hriat a pawimawh a ni, a ti a. An kal zelna turah duhsakna a hlan nghal a ni.

Rotary Club of Aizawl hruaitute chuan COVID-19 hripui leng thawhhnihna (second wave) Mizoram in nasa taka a tuar an hmuhin engemaw tih ve tur an nei ni a an hriat avangin Rotary India leh an thawhpui khawvel hmun hrang hranga mi te nen tang tlangin hma an lam tih an sawi a, Health department hotute nen an inrawn hnuah Oxygen Concentrator hi kan mamawh pawimawh berte zinga mi a nih avangin pek an rel tih an sawi a, Health Minister hnena Oxygen Concentrator 135 an hlan bakah hian Health Minister-in a ngen angin Baptist COVID Care Centre, Christian Hospital, Serkawna hman tur Oxygen Concentrator 10 pawh niminah an hlan tih an sawi a, Mizoramin hripui leng a dona kawnga a mamawh thildangte pawh ngaihtuah zel an tum tih an sawi a. Thenawm ram atanga raltlan rawn tlanchhiate tan pawh a theih ang anga luangchhuak turin ruahmanna an siam tawh tih an sawi bawk a ni.

Rotary Club of aizawlin Oxygen Concentrator vawiina an hlan hi pakhat cheng nuai 1 man niin, a vaiin cheng nuai 135 man hu a ni a, nimin lama Christian Hospital, serkawna an hlante nen hian a vaiin 145, cheng nuai 145 man a ni. Oxygen Concentrator pakhat hi litre 10 dawng zel a ni.

Heng Oxygen Concentratorte hi COVID-19 hri kaite enkawlna hmun hrang hrangah sem darh a ni ang.

Rotary Club of aizawl aiawh hian Rtn. Sanjana Baruah, President, Rtn Eileen Lalrinpuii, Secretary, Rtn. Zothantluanga, President-elect leh member thenkhatten thilpek hi an hlan a ni.