No.2302/2021-2022

Aizawl, the 22nd September 2021 : Vawiin khan Land Revenue & Settlement changtu Minister Pu Lalruatkima chuan Salem Local Council leh khawtlang hruaituten an vengin, Govt. Aizawl College, Mualpui, World Bank Road bulah vantlang hmun tana ram an lo humhalh leh helai hmun an dil chungchangah a hmunah Revenue Department hotute hruaiin a enpui.

Pu Lalruatkima chuan Mualpui leh hmun danga Sawrkarin House Site Plan a ruahmanah hian harsatna hrang hrang a tawk thin tih sawiin chung zinga langsar te chu khawtlang hmunhma leh inkalpawhna kawng atana ram zuah a awm loh thin vangte, ram neituten an ram chin tha taka an hung loh vangte a ni fo a ti a. Hengte hian Department hnathawh nasa takin a nghawng a, ramri buai chingfel turin ram hi teh nawn fo a ngai thin a, surveyor kan indaih lo nasa a, survey hna a khaihlak fo thin niin a sawi. Minister chuan a sawizaunaah mimal duhamna avangin Sawrkarin ram a neih mang tawh loh chu a ngaimawh thu sawiin, Land reforms te hi kan kalpui a ngai a. Land reforms danah hian ram neih dan chi hrang hrang a awm bakah mimal ina ram an neih theih zat pawh bithliah a ni a ti.

Salem Veng khawtlang in World Bank Road chhaka ram ruak nia sawi khawtlang hmunhma atana tinzawna an lo humhalh chu an fakawm a tih rualin helai hmun an dil chu Department in an lo enzui leh an zirchian hnuin, ram buai leh mimal ram anih loh chuan dan dik tak hnuaiah vantlang hmasawnna atana pek chu tha a tih thu khawtlang hruaitute a hrilh a ni.

Minister hi Land Revenue & Settlement Director Pi Angela Zothanpuii leh Department official dangten an tawiawm a ni.