No.6758/2020-2021

Lunglei, the 3rd December, 2020 – Vawiin khan Lunglei District Task Force on Immunization (DTFI) chu DC Conference Hall-ah Additional DC Lunglei Pu R. Vanrengpuia kaihhruaiin an thu khawm. Meeting-ah hian Lunglei CMO Dr Lalthlamuana leh H&FW hnathawktute, WHO Surveillance Medical Officer Dr Lalhlimpuii, YMA, VC Association, UNDP aiawhte leh sawrkar official dangte an tel.

Dr. Lalhlimpuii, Surveillance Medical Officer, World Health Organisation (WHO) chuan powerpoint presentation hmangin Routine Immunization hmalaknaa Lunglei District dinhmun leh Covid-19 vaccine chungchang a sawifiah a. India ramah Covid-19 vaccine (hri danna) chi nga (5) chu peih fel tep (advanced stages of development) tawh niin, Covid-19 vaccine siamchhuah a nih hnua India ram hmun hrang hranga sem chhuah leh a buaipui zui dan tur chungchangah sawrkar laipui leh state sawrkarte pawh an inpuahchah mek tih a sawi a. Sawrkar laipui chuan vaccine pek chhuah theih a nih veleh healthcare worker-te pek hmasak turin ruahmanna a siam a, hemi atan hian Lunglei District healthcare worker database pawh buatsaih niin, sawrkar hospital leh health centre 17 leh private hospital pali (4)-a thawk mi 1908 hming thehluh tawh a ni a, Lunglei District-a vaccine dah thatna tur hmun 'cold chain storage point' bakah, vaccine pek chhuahna hmun tur leh a pe chhuaktu tur te pawh ruahman fel tawh a nih thu a sawi.

Covid-19 vaccine peih fel tep a nih avanga inthlahdah phah lo tur leh fimkhur chhunzawm zel turin Surveillance Medical Officer, World Health Organisation (WHO) chuan mipuite chahin, Routine Immunization kalpui mek pawh ngai pawimawh chhunzawm zel turin a chah a. Vaccine dang ang bawkin Covid-19 vaccine chu a haw deuh leh damloh/khawsik phah te pawh an la awm thei dawn a; Covid-19 vaccine chungchangah thudik lo leh belhchian dawl lo thehdarh lo tura mipuite kan zirtir a tul hle dawn a ni, a ti bawk. District Level Task Force on Covid-19 vaccination leh Block Level Task Force on Covid-19 vaccination pawh din anih tur thu a sawi a ni.

Bunghmun, Lungsen leh Tlabung Medical Officer-ten report pein an hnathawhna lamah kawng hrang hrang a harsatna an tawh thin te sawilangin Lunglei District khawthlang lam ah te inkalpawhna leh inbiakpawhna a that tawk loh avanga harsatna an tawh fo thu an sawi a. Tin, vaccine la duh lo te an awm fo avangin harsatna nasa tak an tawk thin bawk a ni. BDO te nen tangkawpa chak zawka hmalak anih theihnan vawiin meeting-ah hian District administration leh BDO-te hnenah an mamawhte an thlen a ni.

 ROUTINE IMMUNIZATION (RI) ACHIEVEMENT 2018-19,2019-20 LUNGLEI DISTRICT