Vawiin khan Chief Information Commissioner Pu Lal Dingliana IFS hovin a pisa-ah October thla tir lamah RTI Hapta (RTI Week) hman dan tur sawiho a ni a. Meeting ah hian State Information Commissioner Pu L. Hrangnawna IPS (Rtd), I & PR Director Pu Jim K.Chozah leh Mizoram State Information Commission-a officer te an tel a ni.

Meeting ah hian Right to Information Act hi SPIO leh APIO ten an belhchian leh zawk nan leh an intuai hriam zel theih nan booklet te siam a sem nise tih an rel bakah heng booklet te hi Sawrkar pisa zawng zawng ah te pawh sem vek nise an ti a. RTI Hapta hawnna inkhawm October ni 5 Vanapa Hall-ah a hman turah Chief Minister Pu Lal Thanhawla chu khuallian atan sawm nise tih an rel a. Nikum lamah MSIC kaihhruaina hnuaiah Serchhip leh Lunglei a RTI Hapta inkhawm leh RTI chungchanga inhrilhriatna hun a lo buatsaih ang bawk in kumin a chuan Chief Information Commissioner in October ni 8 ah Kolasib-a leh State Information Commissioner in October ni 8 a Lawngtlai-a te hmanpui ni se tih rel a ni a. District dangah te chuan Information & Public Relations Department-in lo hma se tih an rel bakah a tul anga hma lo la turin MSIC hotute hian I & PR Department chu an ngen nghal bawk a ni.

RTI Hapta hi ram pumah October ni 5 -12 (karkhat) chhung hman thin a ni a.