Vawiin chawhma dar 11 : 00 khan I&PR Conference Hall, Saiha-ah R.T.I.Week, 2011 hawnna neih a ni. He R.T.I.Week, 2011 hawnna inkhawm hi Pu N.Vabeiratlua I&PRO Saiha chuan a kaihruai a, District Bawrhsap Pu Kunal IAS chu khuallian a ni.

R.T.I.Week, 2011 hawnna thuchah sawiin khuallian chuan R.T.I. chu thudik tarlanna hmanraw pawimawh tak a ni, tiin R.T.I. hian sawrkar chu langtlang sawrkar -ah a siam thei a, dik tak leh huaisen taka mipui ten kan hman chuan kan sawrkar inrelbawl dan hmelhmang thlengin kan ti danglam thei a ni, a ti bawk. “Knowlege is Power” tih anih angin Knowledge nei tur chuan information a neih phawt a ngai a, Democracy ah chuan kan aiawh tur leh min enkawl turin sawrkar kan siam a, chu sawrkar in min enkawl dan tur hriat ve chu kan chanvo diktak a ni, a ti bawk. Tun atanga chuan RTI Act hi zir ila, kan sawrkar khalh ngil nan hman i tum theuh ang u tiin kalkhawmte chu a chah a ni.

Pu Laldinpuia Tlau, Judicial Magistrate, Saiha pawhin thu sawiin sawrkar inrelbawl dan ah hian ngaihdan hlui leh ngaihdan thar a awm thu sawiin ngaihdan hlui ah chuan sawrkar inrelbawl dan hi mipuite hriattir leh mipuite hriata puan chhuah a harsat thu sawiin ngaihdan thar ah chuan sawrkar in relbawl dan hrang hrangte chu mipuite hriata puanzar anih thin thu a sawi a, RTI in a tum ber chu sawrkar hnuaia din leh sawrkar tanpuina hmanga kal thuneitute hnathawh reng reng langtlang leh chhiar theiha siam a ni, a ti bawk. He R.T.I.Week hawnna inkhawm ah hian Pu N.Chakhai, Project Director, D.R.D.A. leh Additional D.C. Saiha ni bawk pawh in thu sawina a nei a, zaithiam zai te ngaihthlak niin Saiha khawpui chhung Village Council hrang hrang aiawh te, Tlawmngaipawl hrang hrang hruaitute, Higher Secondary School hrang hrang pali atangin zirlai naupang 10 leh zirtirtu pakhat theuh an tel bakah M.J.A. Member te leh District Council lam atangin SPIO leh SAPIO te bakah Mizoram sawrkar hnuaia Department hrang hrang hotute an tel kim hle a, chairman in lawmthu sawina neiin he RTI Week, 2011 hawnna inkhawm hi tih tawp a ni.