Vawiin zing dar 11:00AM hian I&PR Conference Hall, Mamit-ah Right To Information Week, 2011 (Ni 5th Oct atanga 12th Oct 2011) chu Pu A. Biaklawma Addl D.C Mamit chuan a hawng.

Hawnna Inkhawm Pu P.H Rualzakhuma DLAO, Mamit kaihhruaiah hawnna thu sawiin Right To Information Act (RTI Act) hi Mizoram ah a thuphunga kan hriatna a rei tawhin a awmzia tak mipuiten duh anga kan hre tawk lo hi a pawi hle a, He RTI Act hi mipuite chanvo dik tak anih thu leh he dan hmang hian mipuiten kan chanvo tur chiang takin kan hre thei a, chu chuan Democracy ram kan nihna atakin a lantir thei a ni a ti. He RTI Act hi mipuiten a hlutna hrechiang a hmang tangkai tura zirtirna pe chhawng thei turin kalkhawm te a chah bawk.

He Right To Information Week 2011, hawnna hunah hian RTI Act thil tum leh hman dan turte inhrilhriatna hun Pu C. Lalnunkima IPRO Mamit in neiin sawihona leh zawhna leh chhanna hunte buatsaih a ni bawk.

Right To Information Week 2011 hawnna ah hian Mamit khawpui chhunga Heads of Offices, SPIO, SAPIO, Tlawmngai Pawl hrang hrang hruaitute, Village Council members te bakah chanchinbu mite an tel tha hle a ni.