Vawiin khan Kolasib DC Conference Hall-ah RTI Week 2011 hawn a ni a, Week hawngtu Kolasib DC Pi Niharika Rai, IAS chuan RTI Act hi Mipui te hmakhaw humhalhna Dan ropui tak ni mahse dik taka kan hman loh chuan ramin a chhawr tur angin a chhawr lovang, a ti.

Pi Rai chuan, RTI Act hi dan tha tak ni mahse a thatna leh thatlohna lai hi buk tham tak a ni, a ti a. Zawhna zawttuten tuemaw tih dik loh zawng ringawta kan buai chuan a dik lovang a ti a. Office tinah tlinlohna a awm vek a. Chumi chu hre rengin RTI kan hman dawn pawhin thil siam tha tur zawnga rilru pu chunga kan zawh fo a tha a ni, a ti a. Khua leh tui te he Dan hian min tichak a, ram inrelbawlnaah tel ve nia inhriatna thuk tak mite rilruah a siam a ni tiin chu chuan ram siamthat duhna thui tak mipui thinlungah a tuh a. Democracy kalphung dik tak kan zawhna kailawn pawh a ni tiin he RTI Act hi mipui ten dik taka kan hman tangkai ka duh a ni, Pi Rai chuan a ti a ni.

Pu Zairemmawia, Addl. DC, Kolasib kaihhruai Week hawnna inkhawmah hian Pu Madhur Verma, IPS, Kolasib SP chuan RTI chungchangah zirtirna ngaihnawm tak a pe a. SPIO leh DAA nihna hmun hrang hranga a chelh tawh chungchang a a thil tawn te a sawi bawk a ni.

Pi Lallianpuii, MIS, DIPRO Kolasib chuan Key note address pein Mizorama RTI Act hman atanga tun dinhmun enin mipui ten sawrkar hnathawh dan nasa takin an hriat phah tawh a, sawrkar pawh mipui tan nasa takin a insiam rem tawh a ni, a ti a. Kum 2006-2007 chhunga RTI Act hmanga information dilna 476 public authorities 125 in an dawn lain kum 2009-2010 ah chuan public authorities 158-in dilna 695 an hmu tawh a ni, a ti.

Hun hma lama mipui hnena RTI chungchang zawhna zawt duhte tana sawmna tih chhuah atanga zawhna lutte he hunah hian chhan a ni a. A zavaiin zawhna 23 zawha chhan a ni.

RTI Week hawnna ah hian sawrkar Deptt. hrang hranga DAA/SPIO leh SAPIO te an tel a. NGO hruaitute leh Kolasib khawchhung bakah Kawnpui leh Vairengte atangin Journalist te an tel bawk . Pu K. Lalthlamuana, President, MJA, Kolasib chuan Vote of Thanks sawiin hun a khar a ni.