Vawiin chawhma dar 11.00 khan DIPRO bultumin CHANEM Building, Champhai-a I&PR Conference Hall-ah Right to Information Week, Oct. 5 - 12, 2011 hawnna inkhawm neih a ni a, hawnna inkhawm hi Champhai District SP Pu C.Lalthanmawia’n kaihruaiin Champhai DC Pu Vijay Kumar Bidhuri chu Khuallian a ni.

Khuallian chuan hawnna thu sawiin RTI in a tum ber chu, sawrkar in a hnathawh dan leh, a hmalakna hrang hrangte, khua leh tuiten chiang tak leh, a nihna ang taka kan hriat duh te kan hriat theihna tura Dan hmanga ruahmanna a sam hi a ni. Right to Information Act 2005 hman a lo nih hnu hi chuan, sawrkar hnathawh dan leh hmalakna kan hriat duh apiangte, kan zawtfiahin kan hre thei a, RTI hmanga kan zawhna te chu sawrkarin min chhang ngei tur a ni bawk a ni.a ti a. Khua leh tui te tana langtlang leh zau taka inhawng sawrkar hi, democracy thanlen zel na tura sawrkar kalphung tur pawimawh tak pakhat a ni a. RTI hi hemi hlawhtlinna atana hmanraw pawimawh tak pakhat a ni a. Sawrkar rorelna leh kalphung, khua leh tui ten dik tak leh chiang taka an hriat ve theihna tur leh sawrkar hnathawkte pawhin, dik tak leh chiang taka an hriat ve theihna tur leh sawrkar hnathawkte pawhin dik taka hna kan thawh na turin he Act hi ruahman a ni. Chumi avang chuan, sawrkar hnathawkte leh Agency hrang hrangah, dik leh felfai takin hna thawh a ni thei dawn a ni a ti bawk.

Sawi zelin khuallian DC chuan RTI hlawhtling taka a awm theihna tur chuan, sawrkar hnathawktute leh mipuite inkarah indaidanna thil thup awm lova, kan tan hova, inthurual taka kan kal ho a pawimawh a. Mimal tute emaw intih hmingchhiat tumna avanga he dan hi hman tur a ni lova, khua leh tui ten sawrkar thatna leh hnathawhte a nihna ang leh dik taka kan hriat theihna tura puitu a ni tih kan hriat a tha a ni a ti a. Kan district Champhai ah ngei pawh. RTI Act zulzui leh mipuite tana rawngbawlna zau zawk leh tangkai zawk anih theih nan, Champhai District Information & Grievances System chu hman tan mek a ni a. Hei hian a tum ber chu mipuiten awlsam leh zangkhai zawka sawrkar hmalakna kan hriat theihna tur leh complaint te rang tak kan thlen theihna tur atana buatsaih ani tiin a sawi.

Pi K.Laldingliani, DIPRO chuan Keynote Address sawiin vawiin hian India ram pumah a vawikhatna atan RTI Week hi hman tan a ni a, he Week in a tum ber chu Sorkar hi mipui ta a nih angin Sorkar hmalakna te mipuiin an hriat zau deuh deuh theihna tura a tam thei ang ber hrilhriat a ni. Information Department a Officer te hi Mizoram Information Service (MIS) kan ni a, kan thupui chu “Min tir ta che” tih a ni a, Department hrang hrang ten in hmalakna mipui hnena puanzarna turah min hmang tangkai rawh u, tiin kan chah che u a ni, a ti a, RTI hi kan la hman zel dawn avangin mitinin kan hriat chian a pawimawh a, RTI hi mi dik lohna hailana tur chauh atan hman tur a ni lova, kan hnathawh that te mipui hriat tura puanzar pawh a huam tel vek a ni, a ti a, Champhai DC in Champhai District tana hma a lakna chi hrang hrangte hun reilote awm chhunga thiam taka mizo tawng a hman theih na kawngah leh in biak pawh zung zung na tura lehkha bu tangkai tak a buatsaih te leh Champhai hmasawn nana a hnathawh tangkai tak tak te a sawi lang bawk.

Vawiin Week hawnna inkhawmah hian sawihona hun hman niin Champhai District chhung bika RTI tihchakna atan inbiakpawhna tihchangtlun zel a tul thu te ngaihthlak a niin zaithiam zai te ngaihtlak a ni a, Pu K.Lalrintluanga, DEO chuan lawmthu sawiin he inkhawm hi a khar a ni. RTI Week hawnnaah hian kalkhawm an thahnem hle.