Mizoram Information Commission leh Directorate of Information & Public Relations tangkawpina an buatsaih, Mizoram pum huap, Right to Information(RTI) Week, 5th - 12th October 2011 chu Chief Minister Pu Lal Thanhawla chuan vawiin khan Vanapa Hall-ah a hawng. Hemi rual vek hian Mizoram district khawpui dang, Serchhip leh Lunglei tih lohah, hman a ni bawk.

Chief Minister chuan RTI Danin a tum, sorkar langtlang leh rintlak a awm theih nan leh hlemhletna tihbo anih theih nan India khua leh tui tupawhin sorkar hnathawh dan leh pawisa hman dan thlenga hriat duh a hriat theihna tura ruahmanna siam a ni a ti a. Hemi tihhlawhtling tur hian central leh state tinah Information Commssion din a ni a ti a. Mizoramah pawh Mizoram Information Commission kan neih atangin RTI Dan hi kum 5 kan lo hmang ve ta a ni a ti.RTI hmang tangkai thiam ram apiang an changkang thin a ni tiin, ram hmasawn leh changkang kan tih te hi RTI an hman thiam vang a ni a ti. Chuvangin zau zawka mipui ten an hman tangkai theih nan awareness campaign te neiha, zirtirna pek thin a tul hle a ni a ti.

Chief Minister chuan Mizoram ah a vawikhatna atan RTI Week hmang thei tura Mizoram Information Commission leh Directorate of Information & Public Relations tangkawp ina Aizawl khawpui leh district Hqrs a programme an siam chu tha a tih thu a sawi a. Sorkar hotute leh a hnathawkte, politicians te, NGO te, Media leh mipui zawng zawng, mahni dik leh thil dik duh tan chuan RTI Act hi thil tha leh pawimawh tak, hlauh zawnga en tur anilo a ti a. Sorkar sum hmu leh ring zawng zawng organisations te chuan RTI hmanga hriat duh diltute hnenah thudik an pe ngei tur a ni a ti. Department tina Appellate Authority te, SPIO leh SAPIO te chu an hna pangngai baka hna pek an ni hi ram leh mipui tana hna pawimawh tak thawk an ni tih inhria a, phur tak leh tui taka thawk turin a chah a ni.

Chief Minister chuan Mizoram Information Commision ah hian member 3 an awm theih thu sawiin, sum dinhmunin a phak loh avangin hnawh khah vek anih loh thu leh case neih dan azirin thutlukna chu siam zel ani ang tih a sawi a. Chief Information Commissioner(CIC) tur hian IAS emaw IFS emaw IPS emaw nise tih chu, tun thlenga chutianga la kal thei ani chu a lawmawm hle a ni a ti a. Mizoram Information Commissionah hian sanction posts 33 a awm thu a sawilang bawk a. Kum 2006 - 2007 a RTI Act hmanga information dilna 476 Public Authorities(SPIO/SAPIO) 125 in an dawn laiin kum 2008 -2010 ah Public Authorities 158 in dilna 695 an dawn thu sawilangin, hei hian Mizoramah RTI hmanna a hlawhtling chho zel tih a lantir a ni a ti.

Inkhawm Chairman Pu Lal M.Dingliana, IFS (Rtd) chuan RTI Act hi kum 2005, June thla a Parliament in alo passed tawh anih thu a sawi a. Mizoramah tangkai taka hman anih zel theihna turin awareness campaign neih ala tul chho dawn chauh a ni a ti a. Mipui ten RTI Dan kan hmelhriat deuh deuh theihna tura hmalak zel dan tur sawiho turin New Delhi ah Chief Information Commissioner te intawhkhawmna neih turah tel ve ngei a tum thu a sawilang bawk a ni.

RTI Dan sawifiahna neiin Pu Jim K Chozah, Director, I&PR chuan ram changkangah te chuan kum tam tak an lo hman tawh thu a sawi a. Democracy rama mipui sorkar inrelbawl dan mitinin kan hriat theih nan RTI Dan hi hman a ni tiin, India ramah pawh mipui ten an thil hriat duh leh an chanvo dik tak hriat anih theihna turin RTI Dan hman hi ram Danpuiah ‘Fundamental Rights’ a dah anih thu a sawi bawk a ni.

Hawnna inkhawmah hian Ministers, Parlimentary Secretary te, MLA leh Official pawimawh tak tak an tel a. An ni bakah hian tlawmngai pawl atang te, MJA te leh Law College leh Mizoram University atang te in mi thahnem tak an tel bawk a ni.