Vawiin chawhma dar 11 : 00 Am khan Observance of RTI Week-2015 chu I&PR Conference Hall, Siaha-ah hlawhtling taka hman a ni.He RTI Week hmanna programme hi Pu N.Vabeiratlua, I&PRO Siaha chuan a kaihruaia, Pu RT Zachono CEM, MADC chu Khuallian niin; Pu N.Chakhai, Additional Deputy Commissioner, Siaha District, Siaha chu Khualzahawm a ni.

Thu sawiin Khuallian chuan RTI Act hian mipuiten sawrkar kaldan leh inrelbawl danah kan hriattur hriat ve theihna chanvo min humhalh saktu Dan tha tak a ni, a ti a. RTI hi langtlang taka kal tura sawrkar khalhngilna hmanrua tha tak a ni, a ti bawk.Sawrkar department hotute pawhin Information diltute chu hawihhawm taka lo chhang thin turin a chah a, mipui te pawhin rilru thianghlim tak pu a RTI Act hmang turin a chah hlawm a ni.

Khualzahawm Pu N.Chakhai, Additional Deputy Commissioner, Siaha District, Siaha pawhin thu sawiin RTI dan hmanga zawhna te tha taka chhan thin a pawimawh thu leh he dan hmanga thu zawhte hi zawh tur chin leh zawh loh tur chin a awm thu a sawi a, he dan hian midangte tih hmingchhiat tumna lam a kawk lo a ni, ati bawk. Department hrang hrangte hnathawh dan pawh RTI dan hmang hian mipui ten kan zawt thei a ni tiin, he Dan hmanga zawhna dawn te dik leh fel taka chhan thin a pawimawh thu a sawi a. RTI Act hi mipuiten kan chhawr tangkai chho mek zel a, Corruption do nan pawh RTI act hi mi tam takin an hmang mek tawh a ni, a ti bawk.

He RTI Week-2015 hmanna programme hi session hniha then a ni a, Session hnihna chu zawhna leh Chhanna hun a tana hman a ni a. He 2nd session hi Pu M.Baithai, Secretary, MJA, Saiha District kaihhruaina hnuaiah hman niin, heng zawhna te hi Dr HTC Lalrinchhana, CJM leh Pu N.Vabeiratlua, I&PRO Siaha ten an chhang a ni.

He RTI Week hmanna programme-ah hian Siaha District chhunga Department hrang hrang hotute, Political Party hrang hrang hruaitute, Tlawmngai pawl hrang hrang hruaitute, Government Siaha College zirlaite, School hrang hrang thlanbik atanga zirlaite leh Chanchinbu mite an telkim hle a ni.