Vawiin hian Lawngtlai DC Conference Hall ah Right to Information Week, 2015 chu hlawhtling taka hman a ni a, Lawngtlai Bawrhsap Pu J. Hmingthanmawia chu khuallian a ni.

Khuallian chuan RTI Mizoramah hman a nih atangin kum tin RTI hmanga zawhna lut a pung chho zel a, chu chuan mipuiten ram hmasawnna hnathawh kawngah an duh tui tial tial a ni, tih a tilang a ni a ti. RTI dan chu ram siam that nan leh mipuite leh sawrkar thawhhona tha zawk a awm theih nana siam a nih angin tute emaw tihmualphona atan te, huat zawngte beihna atan te a hman tur a ni lo, a ti bawk. Sawrkar chu mipuite ta, mipuite tana a siam a nih ang ngeiin mipuiten chanvo pawimawh ber chang se la, sawrkar hnathawktute hna pawimawh ber pawh mipuite tanpui a ni reng tur a ni, a ti.

RTI Week hmanna ah hian Pu H. Dolianbuaia, MCS Project Director, DRDA Lawngtlai chuan RTI chungchang zirtirna a pe a, Pu Laldinpuia Tlau, Chief Judicial Magistrate in RTI chungchanga Supreme Court rorelna hrang hrangte a zirtir thung a, kalkhawm te atanga zawhna lut hrang hrangte an chhang nghal a ni.

Hemi hnu hian RTI hmang tura lo kalkhawm te chuan zawhna hrang hrang a zawt a, SAPIO leh SPIO ten RTI zawhna an dawn thenkhata harsatna an tawhte pawh sawi ho a ni bawk.

RTI Week hmanna inkhawm hi Pu K. Saitluanga, MIS, IPRO Lawngtlaiin a kaihruaia, a ni hian RTI hmanga zawhna siam ve theih loh list te leh a chhan hrang hrangte sawifiahna hun a hmang ve bawk.

He inkhawmah hian Lawngtlai khawpui chhunga SPIO leh SAPIO zawng zawngte bakah zirlai naupang te, chanchinbumite, tlawmngaipawl hrang hrang aiawhte leh VC member te an kalkhawm a ni.