Thlathar October ni 5 leh 12 inkar hian a vawikhatna atan Mizoramah RTI Week hman a ni dawn a. Mizoram State Chief Information Commissioner Pu Lal M Dingliana hovin a pisaah vawiin khan RTI Week hman dan tur hi uluk takin an rel.

Mipui ten tangkai taka Right to Information Act an hman theih nan RTI Week hman chhung hian hriatzauna, Awareness Campaign District khawpui hrang hrangah hman ni se tiin Meeting chuan a rel a. Hawnna inkhawm usrhsun tak October ni 5 hian Aizawl, Vanapa Hall-ah neih ni se tih leh State Chief Information Commissioner hovin Serchhip leh Lunglei District ah Awareness Campaign buatsaih ni bawk se, an ti a. Vanapa Hall a hawnna programme hman dan tur tlangpui duang lawkin khuallian atan Mizoram Chief Minister Pu Lal Thanhawla chu beisei a ni. Hawnna programe-ah hian Department hrang hranga Appellate Officer, State Public Information Officer (SPIO), State Assistant Public Information Officer, tlawmngaipawl (NGO) hrang hrang te leh mi pawimawh dangte sawm an ni ang. Hun remchang hmasa berah Saiha, Lawngtlai, Champhai, Kolasib leh Mamitah te RTI Awareness Campaign hi neih chhunzawm a ni bawk ang. RTI Awareness Campaign neih tura senso hi sorkar laipuiin a tum dawn a ni.

Vawiin meeting-ah hian I &PR Director Pu Jim K. Chozah, State Information Commission Secretary Pi Liansawmi te leh Officer dang te an tel a ni.