RTI week vawi 6 na chu vawiin khan Parish Hall, Kolasib-ah District Bawrhsap Pu H.Lalengmawia'n a hawng a, Right to Information Act 2005 hnuaia mipuite hnena sawrkar information pek chhuah dan zirho nghal a ni.

Hawnna inkhawm Pu R.Lalremsanga, Addl.DC kaihhruaiah hian Bawrhsap Pu. H. Lalengmawia chuan Right to Information Act, 2005 chuan sorkar leh public authorities te hmalakna hriat ve theihna chanvo min pe a ni tiin, he chanvo hi kan hman that a tul a ni a ti. Mipuiin thil kan hriat tam hi a pawimawh a, ram hmasawnna atan hruaitu tha mai nilo in mipui thil chinchang kan hriat angai a ni a ti a. RTI Act hmang hian sorkar khalh ngil theituah kan ding a, sorkar awm hle hle lo turin kan siam thei a ni a ti a. Sorkar Department te pawn kan hmalakna te leh hnathawh RTI hmanga dilchhuah kher ngai lova mipui hriata phochhuak thin tur kan ni tih hria a, chumi tur chuan pochhuah ngam kan nih theih nan dik taka thiltih pawh a ngai a ni a ti.

Week hawnna a kalkhawm te pawh mahni hriat mai duhtawk lova midang hrilhhretu a tang thin turin a chah a. Chutih rualin RTI chu phuba lak nan leh mahni hmasial taka hman a rem loh thu a sawi bawk a. RTI a nihna tur ang taka hman a nih zel theih nan chak leh zau zawka hmalakna a awm zel a beisei thu sawiin, hemi kawngah official te tang turin a chah a ni.

Hawnna inkhawmah hian Pu H.Vanlalnghaka, President MJA, Kolasib pawhin thusawiin RTI chuan a tum ber a thleng em tih leh a hmang tangkai tu tur ten an hre chiang em tih hriat a pawimawh thu a sawi a ni.

RTI week pual hian district thlan bik pathumah 'Seminar cum worksop on RTI' neih a ni a, thlan bik zingah Kolasib telin vawiin vek khan RTI chungchang zirhona hi neih nghal a ni a.

He zirhona hun hi Pi JH Lalparmawii, DIPRO chuan kaihruaiin, Pu Vanlalngena, Secy.,MIC in Keynote address a pe a. Pu R.Zadawla, Dy. Secy. MIC chu Resource Person niin, RTI chungchanga official hriat tur leh a diltu hriat tur pawimawh te a sawi a ni. He hunah hian District Office hrang hranga SPIO, SAPIO te, dealing clerk te, khawpui chhung VC te, tlawmngaipawl hrang hrang aiawh te bakah College naupang te an tel a ni.

Zawhna leh chhanna hun buatsaih niin, hun hlawk thlak tak hman a ni.