407/2024-2025

Serchhip, 3rd May, 2024 : Nimin May ni 2 (Ningani) tlaia ruah leh thlipui nasa tak thawk avangin Thenzawl khaw chhungah chenna in leh bungrua engemawzat a chhia a. Serchhip DC Pu David Lalthantluanga chuan tukin khan Thenzawl khua hi tlawhin a hmunah a enfiah a, chhiat tawk chhungkua te hnenah hian State Disaster Response Fund atangin tanpuina sumfai a hlan nghal a ni.

Thenzawl Vengtharah Pi Lalawmpuii, Pi Zohmangaihi, Pu Neinunga leh Pi Lalhmingmawii te in chu thli leh ruah hian a tichhe hneh hle a, luahzui tlak loh (fully damaged) niin heng chhungkaw pali te hnenah hian DC chuan zangnadawmna leh tanpuina sumfai cheng nuai khat leh singhnih (Rs.1,20,000) theuh a hlan a ni. Thenzawl Vengtharah hian chenna in paruk chu inchung chhia leh siam that ngai (partially damaged) a awm a. Thenzawl Venghlunah chenna in pariat leh Thenzawl Vengthlangah chenna in pathum te chu thli leh ruah hian a tichhe nual bawk a. Heng chhungkaw 17 te hnenah hian DC Pu David Lalthantluanga chuan an in leh bungraw chhiat nasat dana zirin tanpuina sum engemawzat a hlan a. Heng Village Council pahnih -Thenzawl Vengthar leh Thenzawl Venghlunah te hian hnatlang thingpui inna tur sumfai a hlan bawk a. Vawiina SDRF kaltlanga Thenzawl a chhiat tawk te tana sumfai pekchhuah zawng zawng zat hi Rs.5,57,000 a ni.

Serchhip District chhunga thlipui leh ruahpui nasa tak thawk avang hian Serchhip DC Office a Disaster Branch Emergency Call Centre chu nimin tlai atang khan zankhuaiin tih nun nghal niin englai pawha biak pawh theih turin hawn a ni a. Tanpuina mamawh te tana Emergency Call Centre biak pawh theihna phone number leh thil pawimawh dang te social media kaltlangin mipui hnenah puanzar nghal a ni.

Serchhip District chhung Vanchengte khua leh Thinglianah chenna in engmawzat chu ruah leh rial hian a tichhe nual bawk a. Vanchengte ah hian tun thlengin chenna in chhia report lut zat chu 16 a tling tawh a ni. Serchhip khawpui chhungah chuan P&E Veng leh Vengchungah chhiat tawk awmin heng chhungkuate hnenah hian Addl. DC Pu James Lalnithanga chuan tukin vek khan tanpuina sumfai a hlan bawk a ni.

Serchhip SP Pu MS Dawngkima pawhin P&E Veng, Serchhipa in chhia thawmthat hnatlang thingpui in na tur sum a hlan a. Thenzawl Joint VC te hnenah hnatlang thinpui inna tur sumfai a pe bawk a ni.