Ministry of Social Justice & Empowerment hnuaia National Institute for the Orthopaedically Handicapped (NIOH) hmalaknain Lunglei, Saiha leh Champhai-ah te rualbanlote enkawl dan tur Training an buatsaih mek a. February ni 4, 2014 (Thawhlehni) khan Synod Conference hall, Lunglei-ah ‘One Day Training on Locomotor Disability & Rehabilitation’ neih a ni a, he hunah hian NIOH atangin Prosthetic & Orthotic Engineer Pu Liton Sarkar a tel ve a ni.

Locomotor Disability & Rehabilitation Training hawnna inkhawmah Lunglei SDO(Civil) Pu Vanlalthiana chuan thuhmahruai sawiin hnam changkang apiangin rualbanlote ngaihsakna chang an hria a, Mizote pawh helamah kan harhchhuah ve tulh tulh a tul tawh tak zet a ni, a ti. Puipunna hmunah leh inkhawmna Biak Inah te pawh rualbanlote an kal ve theihna tur ruahman sak nachang kan hriat a ngai a ni, a ti. Hriatthiamna leh tanpuina an dawn phawt chuan rualbanlote pawhin midangte ang bawkin hlawhtlinna leh nunphung pangngai an nei thei a ni tih hre reng turin kalkhawmte a chah a ni.

NIOH Engineer Pu Liton Sarkar chuan sorkarin rualbanlote tan scheme hrang hrang a kalpui mekte sawizauna a nei a, District level-ah pawh nasa zawka hmalak tum a nih thu a sawi bawk. Training-ah hian Medical officer (Ortho) Dr Joseph Lalrindika pawhin Locomotor Disability chu enge a nih tih sawifiahin hetiang harsatna tawkte tan tanpuina kawng hrang hrang awmte a hrilhfiah bawk a ni. Sorkar Department hrang hrang - PWD, Social Welfare leh Transport - aiawhten rualbanlote tana an department theuh hnuaia ruahmanna awmte leh hmalakna chungchang an sawi bawk.