‘Beisei Ram 2’, Prof. Darchhawna ziak chu vawiin khan I&PR Auditorium-ah Pu R.Romawia, Art & Culture Minister-in a tlangzarh.

Tlangzarh inkhawmah hian Pu R.Romawia chuan mi te fuihthei leh zirtir nei tha tak lehkhabu, tlangzarh theia a awm chu lawmawm a tih thu a sawi a. Prof. Darchhawna te ang tawnhriat ngah tawh tak leh mi thiam tak, an thiamna te hup bo mai mai lova thangtharte fuihtu leh hrilhretu thuziakmi kan la nei chu lawmawm a tih thu a sawi bawk. Thuziak mite chu an thiamna leh tawnhriat te tha thlah hauh lova ziak zel tur a fuihin, an thuziak te chu hun lo kal zel tur pawha rohlu a la nih zel tur thu a sawi bawk.

Prof. Darchhawna hian thuziak lama a thawhhlawk vangin Padma Shree a lo dawng tawh a ni. Vawiina lehkhabu tlangzarh ‘Beisei Ram 2’ ah hian thupui hrang hrang 28 a awm a ni.