Communication & Capacity Development Unit (CCDU), PHE Department chuan Aizawl District a, Village Water & Sanitation Committee (VWSC) Member-te tan vawiin khan CYMA Conference Hall-ah training a buatsaih.

He training-ah hian tui leh a kaihhnawih chungchangah khawtlang leh sawrkar tanho dan tur te, zun leh ek sawngbawl dan te leh Nirmal Bharat Abhiyan (NBA) hnuaia khaw fai lawmman sem a nih thin dan leh a dawng thei tur chin thlan dan zirho na neih a ni.

Training hawnna inkhawm Er. C. Lalremsiama, C.E, Zone-II, PHE Dept. kaihhruaiah hian Er. R. Lalfanliana, E-in-C, PHE Department chu Chief Guest niin, he Training an buatsaih thei hi lawmawm a tih thu a sawi a, Mizoram hmakhaw thui tak ngaihtuah a mipuite chu sawrkar tanpui turin a sawm a. January atanga April thla inkar tui harsa thin lutuk tih ziaawm nana ruahtui khawlkhawm inzirtir thar kan mamawh zia sawilangin, Sorkar laipuiin hetiang kawnga hma la tur hian khawtlang mipuite tha thawh ve tura a phut thu a sawi a, kawng engkimah a enkawltute chu finchhuah leh harsatna sutkianna lamah tan la ho zel turin a ngen bawk a ni.

He training-ah hian thupui thlanbik hmangin Resource Person 3 ten zirtirna pein, VWSC member (Tui Committee) ten an khua/vengchhung hmasawn theihna tur leh harsatna an tawhte sawiin, sawihona hun an nei bawk.

PHE Department hian tun thla ni 24 atanga ni 28 inkar hian Water Week 2014 an hmang dawn a, inkhawm pawimawh tak tak bakah intihsiakna hrang hrang (photography, essay writing, graphic design leh sms hmanga thutawi phuah) a buatsaih dawn bawk a ni.