Vawiin khan Chief Information Commissioner Pu Lal Dingliana IFS (Rtd) chuan Tv R. Lalruatkima 1st Solo Exhibition of Pencil Drawing, Aizawl Art Gallery, MUP Buildinga neih chu a duh a piang tlawh theih turin a hawng.

Exhibition hawngtu Pu Lal Dingliana chuan thu sawiin ' Khawvel hmun hrang hranga India ram tana Ambasador hna a lo thawh tawh thu te, heng a hna avanga Khawvel in a ngaihsan em em Lemziak ropui tak tak te a lo hmuh tawh thu te, Artist te khawvel chu a zawng zawngin tawmpui phak lo mahse an zinga a awm chang leh an kut chhuak a hmuhte chuan boruak thar, ngaihtuahna thianghlim a neih tir thin thu a sawi bawk a ni. Pencil Drawing hmanga Solo Exhibition hmasa ber a hawng thei chu lawmawm a tih thu te, Exhibition buatsaihtu Ruata chu kum la naupang tak, hmabak eng tak nei a nih avangin a thiamna leh theihnate ram leh hnam tana chhuantham a nih theih nan tan la zel turin a fuihin duhsakna a hlan bawk a ni.

Ruata 1st Solo Exhibition of Pencil Drawing hawnna inkhawm hi Pu Laltanpuia, President, Mizoram Art Development Soceity chuan a kai hruai a. I&PR leh Mizoram Art Development Society ten Artist te hmasawnna tur a tana thawhhona tha tak an nei chu lawmawm a tih thu te, Sawrkar in an hmalakna atana kumtin budget-a sum a dah thin chu an tangkai pui thu te, hei hian lemziak mite an kal zelna a tana kawng a hawnsak thu a tarlang sawiin, Ruata 1st Solo Exhibition of Pencil Drawing hian a thalai puite an hna-a hlawhtling tura cho chhuaktu ni thei se a duh thu a tarlang bawk a ni.

Solo Exhibition of Pencil Drawing buatsaihtu Tv R. Lalruatkima pawhin Pathian hruaina leh awmpuina-a Mizorama a hmasa ber a tana Pencil Drawing hmanga Solo exgibition a buatsaih thei chu lawmawm a tih thu sawiin, a bul tanna hi a tawpna a nih loh tur thu leh hmasawn zel tura theih tawp chhuah a hma a lak zel tur thu a sawi bawk a ni.

Ruata 1st Solo Exhibition of Pencil Drawing ah hian lemziak 42 pho chhuah a ni a, May 23 Inrinni thlengin nitin chawhma Dar 10 atanga zan dar 8 a duh a piang tan tlawh theih a ni ang.