Vawiin hi Inter-National Museum Day a ni a. Khawvel pum puia Museum hrang hrangten ni bik, mahni remchan ang theuha a ruala hman tlan turin Inter-National Council of Museum (ICOM)-in 1977 khan he ni hi a puang a ni, Mizoram-ah chuan kum 2005 atang khan hman tan a niin tun tum vawi 10-na tur a ni. International Museum pual hian Mizoram State Museum chu mipui tan en theih turin en man awm lova hawn a ni.

Mizoram State Museum hi Multipurpose Museum ti-a sawi theih a ni a. Tunah hian Museum-ah Gallery 6 - Zoology, History & Mineral Gallery, Anthropology, Ethnology, Textile, Archaeology a awm a. Show case hrang hranga 107-a objects phochhuah zat hi 933 a ni a. Tin, reserve collection-ah object 2824 dah that a niin. A vaia Museum objects lakkhawm tawh zat chu 3757 a ni. October ni 1, 2014 khan Mineral Gallery thar hawn a ni a, khawvel-a leilung hausakna atanga haichhuah lung man tam chi hrang hrang te, tuialhthei leh a dangte chu kan rama thalaite hmuh atan leh zirlaite puitu tha tak a nih beisein Museum-ah hian phochhuah a ni a. Sarda Mines Pvt Ltd te, ONGC te, TATA Steel leh Indian Rare Earths Pvt Ltd-te hnen atangin heng Mineral Samples avaia belhkhawm 65 lai mai an dawng a ni.