No.7143/2020-2021

Vawiin khan Rubber & Allied Crops Development Board chu Chairman Pu R.Lalzirliana, Soil & Water Conservation Minister hovin a office ah an thu khawm a. Board hmalakna hrang hrangte thlir hovin Rubber and Allied Crops Development Board hnuaia thlai chi hrang hrang chingtute tana ruahmanna te sawiho a ni. 

He meeting-ah hian Ministry of Commerce & Industries leh NABARD te nen tang kawpa Mizorama thelret chinna(rubber plantation)tih hmasawnna tur sawi ho a ni a. Rubber chinna atan ram hectare 15,000 laia zauvah hma lak tum a ni a; rubber kung te an hnai theih hma a a chingtu te lo intun nun nan Automative Tyre Manufactureres Association(ATMA) chuan tanpuina an pe thei dawn a, hei hian thlai chingtute nasa takin a chhawk thei dawn a ni.

Rubber chinna atan hian NABARD chuan hectare khat(1)ah cheng za zela 7% pung awmin cheng nuai 3 loan a pe chhuak thei dawn a, Heta 3.5% hi ATMA in an tum sak thei dawn a. He ruahmanna hi hmarchhak states te tan a nih avangin a ti tha te ngei duhsak an nih tur thu vawiin meeting ah hian tarlan a ni a. Huan neitu ten he hamthatna hi an dawn theih nan Rubber and Allied Crops Development Board leh a enkawltu department pawhin chak taka hma lak a nih theih nan a tul ang ang te rang taka buaipui turin an inchah a ni.

He meeting-ah hian SEDP hnuaia kuhva chinna atan sum nuai 75.00 sanctioned pawh sawi lan a niin heng sum te hi awmze nei lova a luan ral loh nan a ti puitling tur dik tak, mi taima leh thawkrim ten an dawn theih nan, a dawngtu tur thlan kawngah pawh fimkhur taka engkim kalpui a nih tur thu tarlan a ni a. Meeting-ah hian Pu Lalrinsanga Ralte Rubber and Allied Crops Development Board Vice Chairman leh member dangte bakah Soil & Water Conservation Department official te an tel a ni.