Vawiin chawhnu khan Dr.K.N. Raghavan, Executive Director, Rubber Board leh a thawpuite chuan Raj Bhavan-ah Governor P.S. Sreedharan Pillai an kawm a. He hunah hian Mizoram chhunga Rubber chinna hmunhma zauh dan kawng sawiho a ni.

Governor P.S. Sreedharan Pillai leh Rubber Board hotute inkawmnah hian Dr.K.N. Raghavan leh a thawpuite chuan India in Rubber a mamawh belh nasat thu te, tun dinhmunah rubber mamawh zat atanga a chanve chiah India ramah tharchhuah a nih thu leh Motor siamtu Industry te an than len chhoh zel avanga Rubber tam tham tak ram pawn atanga chawk luh mek a nih thu te an sawi a. Rubber mamawhnate phuhruk a nih theih nan India hmarchhak lam sawrkarin laipui chuan a rawn hawi thu te an sawi a. Rubber ching tharte tana hamthatna leh Rubber chin tan atanga a tirlam kum 7 chhung senso tumsak chungchangte pawh NABARD nena indawr mek a ni an ti. Rubber Board in a chhut dan chuan tunah hian Mizoram chhungah Rubber chinna chu Hectare 5000 vela zauah kalpui mek a ni a; Rubber chin theihna hmunhma Mizoramah Hectre 35000 vel awm theiin an chhut tih an sawi bawk a ni.

Rubber Board hotute hnenah Governor chuan Mizoramah pawh Rubber chin mek a nih thu te duh anga a tam tham loh thu te leh Mizoram leilung leh sik leh sa te chu mithiam ten Rubber chinna atana hmun tha tak nia an sawi thu te a lo hrilh a. Sawrkar pawhin hei hi a hriat thute sawiin Rubber Board hotute chu Chief Minister leh Minister, LRS&WC bakah Chief Secretary te sawipui turin thurawn a pe a ni.

Tun dinhmunah India rama Rubber tharchhuah 95% hi Kerala state in a thar chhuah a ni a, abak hi Tripura leh State dang te tharchhuah a ni. Mizoramah chuan Rubber chin leh enkawl kawngah Land Resources, Soil & Water Conservation Department(LRS&WC) chu Nodal Department a ni a. LRS&WC kaihruaina hnuaiah rubber hi chin mek niin Mizoram Rubber Planters Association(MIRPA) pawhin theihtawpin sawrkar hmalakna hi a thlawp mek bawk a ni. Tunah hian Mizoramah Thelret huan nei mi 4207 awm mek nia ngaih a ni a. Heng Thelret chingtute zinga mi 1300 vel chu MIRPA member an ni. MIRPA chhut dan chuan tunah hian Thelret kung nuai 15 bawr vel a ding mek a; heng zinga kung nuai 2 chuang zet chu hnai rual an ni tawh a ni.