Chief Minister Pu Zoramthanga chuan vawiin khan Bilkhawthlir a YMA General Conference nakum a thlenna tur hmunhma leh rest house sakna turte tlawh in a enfiah a. Kolasib khaw chhunga sawrkar hmalakna tur hmun thenkhat leh Mualkhang Bottling Plant a tlawh bawk. FCS&CA Minister Pu K. Lalrinliana leh Serlui bialtu MLA Pu Lalrinsanga Ralte ten an tawiawm a ni.

Bilkhawthlir khua in an tangkaipui tur leh YMA khawmpui khua in a thlen tur thlir chungin PWD leh Agriculture Department hmun a rest house sakna tur Chief Minister chuan a en a. Heng hmun pahnihte hi a hmunah architect leh surveyor ten an teh nghal a ni. Chief Minister ho hian khawmpui thlenna tur Bilkhawthlir field chu en ho bawkin, khelmual panna kawng siamthat ngaite leh tuna kawng awm sa chu a len tawk loh avanga kawng thar siamna tur ruahmanna chhawpchhuah chu a enpui bawk a. Bilkhawthlir Park cheibawl dan tur thlithlai in, P&E Department ram leh Health Centre a tlawh bawk.

Chief Minister hian Mualkhang LPG Bottling Plant chu tlawhin IOCL hotute nen he plant hi hman a nih leh theih dan tur te an sawiho a. Petroleum And Explosives Safety Organisation (PESO) endikna hnuhnung berin a phut ang thil tul thenkhat siam belh a ngaih avanga hna chawlh lailawk chu chhunzawm a nih leh theih nana hmalak dan tur FCS&CA Minister te nen lo ngaihtuah tawh a ni. Chief Minister chuan theihtawpa hma a lakpui tur thu a sawi a ni.

Chief Minister hian Kolasib khaw chhunga sawrkar hmalakna hrang hrang te a hmunah a tlawh bawk a. PWD hmun te, District hospital khum za awmna tura ruahmanna te leh internal road widening na tur thenkhat te chu en in, Thingdawl Nursing School, Polytechnic leh Sethawn a Social Welfare department hmalakna te a tlawh bawk.

Kolasib a district hotute leh department hrang hrang a hotute leh khawtlang hruaituten Chief Minister hi an tawiawm a ni.