Vawiin khan DC Conference Hall, Mamit- ah Mamit District chhunga Medical Officer–7 leh Laboratory Technician- 10 te tan nithum awh tur “Hands on training and Distribution of Accuster Mobile Lab” neih a ni a, Dr. Lalrozama, IAS Deputy Commissioner, Mamit- chuan he hun hi hmanpuiin Accuster Mobile Lab semna a nei nghal a ni.

Dr Lalrozama chuan training tura kalkhawm Medical Officer leh Laboratory Technician te chungah lawmthu a sawi a. Accuster Mobile Lab lei anih chhan chu Aspirational District Programme hnuaia Health Parameter Mamit District hmalakna tihhmasawn nan bakah District PHC tinte chu an hnuaia khua theuhah Health Camp te neih a la ngaih dawn avang leh mipui tana awlsam taka thisen test an neih theihna tur leh rethei zawk te'na sum tam tak seng lova an thisen an test theihna tur hmanrua tangkai tak tur a nih dawn avang a ni a ti a. Kal khawmte chu uluk taka training nei turin a chah a ni.

Training-ah hian Accuster Mobile Lab hi PHC/CHC leh District Hospital tin tan sem nghal a ni a. Accuster Mobile Lab hi REC Ltd (Rural Eletrification Corporation Limited) atanga CSR (Corporate Social Responsibility) Fund dawn atanga District Bawrhsap Mamit-in a lei a ni. Accuster Mobile Lab pakhat man hi Rs 4.37 Lakh a ni a, Mamit District tan Accuster Mobile Lab hi 11 (Sawm pakhat) lei a ni. He Accuster Mobile Lab-ah hian thisen Test 36 a tih theih a, Haemoglobin, Glucose, Triglyceride, etc te test theih a ni. Tin, he khawl hi awlsam taka ken kual mai theih anih bakah Solar (Ni zung) chakna hmanga hman theih a ni bawk.

Training-a kalkhawmte hi Accuster Private Limited, New Delhi atangin Pu Gautam Jha, Trainer leh Pu Nitesh Tanti, Service Engineer te chuan zirtirna an pe a ni.