Vawiin chawhnu dar 1.00 khan Mizoram Social Defence & Rehabilitation Board (MSD&RB) lehkhabu buatsaih Damna Lamtluang tih chu Pu PC Lalthanliana, Social Welfare Minister chuan a pisaah a tlangzarh a; he lehkhabu hi ruihhlo leh zu-in a tihbuaite chungchang chipchiar taka zirchianna lehkhabu a ni.

Pu PC Lalthanliana chuan, “Mizoram hi zu leh ruihhlovin min tibuai em em a; he harsatna sukiang tur hian sawrkarin theih tawp a chhuah piah lamah NGO-te leh mimal thahnemngai tam tak kan la neih avangin kan vannei hle a. Ruihhlo bawiha tangte hian Samari mitha anga hmangaihtu, enkawltu leh tuamdamtu an mamawh a ni” a ti. Ruihhlo leh zu-in mimal leh chhungkua a luhchilh thuk deuh deuh thu sawiin, “He harsatna lakah hian kan chhungkua fihlim rih mah ila, fanu-fapa nei chhungkaw tan chuan engtikah nge he harsatna hian min tlakbuak ve ang tih hi engto tham a nih avangin tumah kut insilsan thei kan awm lo” Social Welfare Minister chuan a ti bawk. Pu PC Lalthanliana chuan Damna Lamtluang chu lehkhabu tangkai tak a nih ngei tur thu sawiin, “He lehkhabu hi ngawlvei mek, mahni inchhandam duh, chhandamna kawng zawh ngaihna hrelote tana kawng kawhhmuhtu tur a ni a; anmahni chhanchhuak tura theih tawp chhuah mektute tan lehkhabu rawn tling a ni” a ti.

Pi Lalparmawii, Chief Executive Officer, MSD&RB pawhin thu sawiin, “Ruihhlo leh zu ngawlveite hi a tirah chuan anmahni duh thua tlu lut an nih pawhin an hun kal zelah chuan talchhuah an duh thin a. Ngawlveite enkawlna hmuna mahni duh thu leh tihluihna avanga lutte hian an thatpui ve ve a; ngawlveina hi thluak natna thuk tak a nih avangin enkawl hun chhung rei deuh mah se enkawl dam theih a ni” a ti.

He lehkhabu thlirlawkna hun hmangtu Pu Lallianzuala, Consultant, UNICEF chuan, “Kum 1990 chhova Mizoten AIDS kan hmelhriat tanna chu ruihhlo-ngaite atangin a ni a; tun thleng pawh hian a pu darhtu lian ber pakhat a la ni reng a ni. Chuvang chuan he harsatna hi a hnam anga kan vei a tul zual deuh deuh dawn a ni” a ti.

MSD&RB hi Mizoram sawrkar-in kum 1999 khan a din a; Social Welfare Minister chu Chairman a ni. Ngawlveite leh HIV/AIDS veite enkawlna hmun hrang hrang vil leh hetiang harsatna laka Mizoram a fihlim theihna atana thawh chu an hnapui ber a ni.