Tukin zingkarah khan Central YMA Office tualah ruihhlo chi hrang hrang Supply Reduction Service (SRS)-te man, Rs. 27,66,800/- hu chu halral a ni a. Finance Minister Pu Lalsawta chuan Mizo mipuite leh sawrkarin ruihhlo a duhloh zia leh theihtawpin a do zel dawn tih en tirnan meichher dep kaiin a hal ral.
Ruihhlo halral hma hian hemi puala inkhawm tawite buatsaih a ni a. He inkhawmah hian Minister Pu Lalsawta chuan thu sawiin, “Mizoram chu khawvela in runna hlauhawm ber, ruihhlo hmanga run in a awm mek a ni,” a ti a. Mizoram ramri hmun thum a thena hmun hnih vel lai chu international border a nih bakah, awlsam taka kalpawh theih, khawmual vek a nih miau avangin sawrkar tan pawha luhaithlak khawpin ruihhlo tawlh ruk a hluar tih sawiin Minister chuan, ruihlo do tur chuan sawrkar leh tlawmngaipawlte leh mipuite kan tanrual a ngai a ni, a ti bawk. Minister chuan ruihhlo do kawnga mipuite pawimawhna sawiin, Mizo hnam hi pawn lam mite thil tih engemaw vang mai main a ral dawn lova, Mizorama cheng, Mizote thiltih avang erawh chuan a ral thei a ni tih hre thar leh turin mipuite a chah bawk. Ruihhlo dona kawnga YMA hmalakna fakin Minister chuan, “Mite huat hlawh khawp a YMA-ten an man khawm, ruihhlo kan halral tur hi a bul tanna chauh a ni a, sawrkar pawhin theihtawpin hma a la dawn a ni,” a ti bawk.
Inkhawm hi CYMA Vice President Pu Vanlalruata’n a kaihruai a. CYMA General Secretary Pu Lalhmachhuana chuan ruihlo do kawnga CYMA hmalakna leh an harsatna tawhte a tarlangin, “Dan hnuaiah chuan kan thuneihna piahlam a ni tih hre mahila, dan hnuaia thawktute tichak tura ruihhlo kan do hian, ram leh hnam humhalh tura ke pen chhuak YMA-te hi kan tihloh tur ti-ah kan in ngai lo a ni,” a ti a. Ruihlo leh a kaihhnawiha mante hian an phu tawk hremna an hmu thinlo chu pawi a tih thu sawiin, “Kan man ngaite hi kan man nawn fo a ni,” a ti. Mizoram sawrkar chu Drugs policy leh Drugs control-na turd an mumal tak siam thuai tura an duh thu leh Magistrate-te pawhin tuna dan awmsa hnuaiah pawh sawrkar leh tlawmngaipawlte hi ruihlo do kawngah thahnem ngaihpui deuh se a duh thu a sawi bawk. SRS Secretary Pu R.L. Zomawia chuan April ni 11, 2015 atanga tun hun thlenga SRS hmalakna leh ruihhlo man tawh zat report a pe bawk.
Report-a a landan chuan April ni 11, 2015 atanga February ni 19, 2016 chhung khan CYMA hnuaia SRS-te chuan ruihhlo Rs. 9,00,50,600/- man hu an man tawh a. Ruihhlo man zingah hian metamphetamine (Meth) tam berin mum 2,52,800 (Rs. 7,58,40,000/- man hu) lai an man hman a. Heroin-in dawtin Rs 1,39,23,000/- man hu an man bawk. Heng bakah hian Alprazolam (AP) Rs 2,69,100/- man leh Ganja (Marijuana) Rs. 18,500/- man hu an man tel bawk. Ruihhlo kaihhnawihah hian mihring sangkhat leh pasarih an man tawh a. Chung zinga mi 825 chu Councelling pek an ni a, mi 39 Home leh Centre hrang hranga an dah bakah mi 78 chu excise leh police hnenah an hlan bawk.
Tukina ruihhlo halral tak te hi No 4 hawng 28 leh can 448, Alprazolam strip 274 leh Ganja Kg. 1 a ni a. Aizawla an hralhna rate-a chhutin tukina ruihhlo halral zawng zawng hlutzawng hi Rs. 27,66,800/- a ni.
