597/2026-2027
Dated Aizawl, the 19th May, 2026 : Vawiin khan Home Minister Pu K. Sapdanga leh Excise & Narcotics Minister Pu Lalnghinglova Hmar te kaihhruaiin ruihhlo do beihpui thlak dan review meeting Home Minister pisaah neih a ni.

Meeting-ah hian Home Department, Excise and Narcotics Department, Food and Drugs Administration leh Central YMA hruaitute bakah Aizawl DC leh SP te kokim takin an tel a. Mizoram chhunga ruihhlo do kawnga hma latu hrang hrang kalkhawm hian ruihhlo zuartute, ngawlveite leh ruihhlo zawrhleh inhlanchhawn dan kawng hrang hrang te an sawiho a. Ruihhlo do leh a hmang sualtute leh a zuartute laka beihpuithlak chhunzawm zel dan tur ruahmanna hrang hrang an ngaihtuah a ni.

Tun dinhmunah Mizoram-ah ruihhlo chi hrang hrang – heroin te, khuh damdawi chi hrang hrang te, ganja leh ruihhlo dangte a hluar hle a. Aizawl bikah café culture uar thar avangin thalaite zingah ruihtheih thil hmanna a hluar phah hle ni a hriat a ni bawk.

A bik takin tun hnaiah khuh damdawi (cough syrup) te hi dan ang thlapin Dak In (post office) kaltlangin Mizoram chhungaha lo lut hnem hle tih hriat a ni a. Hemi chungchanga hma lakdan turte pawh chipchiar taka sawiho a ni.

Mizoram pumah September, 2025 thla atang khan Ruihhlo Do beihpui hi thlak tan a ni a, Operation Jericho tia hming vuah a ni. Vawiin meeting-ah hian Operation Jericho a hlawhtlin thungaihthlak a ni a, tha thlah lova kal zel tha tih tlan a ni.

Ruihhlo do kawngah hian Mizoram Police leh Excise Department a thawktute chu Central YMA hnuaia Central Anti-Drug Squad (CADS) ten ngawrh takin an thawhpui zel a.Sawrkar lam atang pawhin sawrkar hnathawkte tha tihchakmai bakah tlawmngai pawlte tha tichak zel turin hma lakchhunzawm zel ni se tih a ni bawk.