3842/2023-2024

Aizawl, the 15th February, 2024: Vawiin chawhnu dar 3:00 khan Excise & Narcotics Minister Pu Lalnghinglova Hmar, Department hotute leh Central Young Mizo Association (CYMA) hruaitute chuan chak leh awmze nei zawka ruihhlo do dan tur chungchangah zau zawka inrawnkhawmna, Committee Room, CYMA Office, Tuikhuahtlang-ah an nei. He hunah hian Excise & Narcotics Department (END) changtu Minister chuan ruihhlo do kawnga CYMA tha tihchak nan Rs. 50,000/- a hlan a ni.

Excise & Narcotics Minister Pu Lalnghinglova Hmar chuan thawhhona tha a awm loh chuan ruihhlo leh a kaihhnawihte chu awlsam taka do hneh theih a nih loh thu sawiin, tha ngah leh ban nei sei zawk YMA nena thawhho chu ngaih pawimawh hmasaka neih a ni a, hemi avang hian inkawmhona hun hman a ni, a ti a. Ruihhlo do dan tha leh awm ze nei zawk kalpui a nih theih nan infinchhuah tawn a tul thu sawiin, YMA hotute chu Excise & Narcotics Department hmalakna kawnga duhkhawp lohna leh hmasawn ngaihna lai awm angte inthlahrung hauh lova hrilhhre zel thin turin a sawm a ni.

Pu Lalnghinglova Hmar chuan Dan in a phut ang leh hmun ngaia awm reng chu ruihhlo do kawnga thil tha ber a nih loh avangin Department chhungah transfer and posting pawh kalpui chhoh mek zel a ni, a ti a. Ruihhlo do kawnga theihtawp chhuaha Sawrkar puitu YMA te hmalakna fakawm tiin, duh thuhmun theuh theuh inkarah inep palh a awm loh nana tanlak tlan dan dap thiam a pawimawh thu leh, thawhdunna tha zawk hnuaiah hmalakna chak lehzual a awm theih nana ngaihtuahna sen tlan a pawimawh thu a sawi bawk.

He hun kaihruaitu CYMA President Pu Lalhmachhuana chuan Excise & Narcotics Minister hnenah duhsakna lantir nan CYMA hmingin Mizo Ipetepui chei a hlan a. Kumpuan Sub-Committee ruahmannain chhun zan zawma duty a nih thu sawiin, ruihhlo leh a kawltu mante dan angin thuneitute hnena hlan thin an nih thu leh councelling pek bakah Home thlenga dah an nih thute pawh a sawi a. Kumpuan Sub-Committee hminga thawk chhuakte'n inpekna vang liau liaua hma an lak thu sawiin, Department nena thawhho kawngah an inhawn reng thu leh hei hian rah tha zawk a chhuah ngei pawh a beisei thu a sawi bawk.

Vawiin END Minister, department thawktute leh CYMA hruaitute inkawmhona hunah hian CYMA Treasurer Pu Roneihthanga'n hunserh hmangin Gen. Secretary Prof. Malsawmliana'n report a pe a. Commissioner of Excise & Narcotics Pu Z. Lalhmangaiha leh Kumpuan Sub-Committee Chairman Prof. Lalnuntluanga, CYMA Vice President-te hnen atangin ruihhlo do kawnga hmalak dan ngaihthlak a ni a. Inhmelhriatna hun hman niin ram leh hnam hmelma ruihhlo do kawnga hmalakho dan turte inpawhtlang taka sawiho a ni a. Thawhhona tha tak neih mek chu thahnemngai taka chhawmnun zel ni se tih a ni bawk a. Zawhna leh chhanna hunte hman niin hun hlawkthlak tak hmanho a ni.

Meeting-ah hian Excise & Narcotics Secretary Pu Lalramsanga Sailo, Jt. Commissioner (Adm.) Pu R. Laldinsanga, Jt. Commissioner (Enfr.) Pu Peter Zohmingthanga leh hotu dangte, Central YMA OB te bakah Central Executive Committee (CEC) leh Kumpuan Sub-Committee member-te an tel a ni.