3841/2023-2024

Aizawl 15th February, 2024 : Pu Vanlalhlana, Transport Minister chuan Mizoram Transport Workers' Association (MTWA) General Assembly Vawi 34-na Joint Director (OP) Conference Hall, Chaltlang-a hman chu khuallian niin a hmanpui.

Transport Minister chuan MTWA Assembly-a khuallian a ni thei chu lawmawm a tih thu sawiin Assembly buatsaihtute chungah lawmthu a sawi a. Transport Department chu mi hausa leh rethei, thalai deuh atanga kum upa zawkte thlenga an dawr thin mipui huapzo department kan nih angin Sorkar hmingthat leh hmingchhiatah pawh mawhphurtu pawimawh tak kan ni a. Kan puanven sawichhing a, kan tan sauh sauh a ngai a ni a ti.

Minister chuan District pathum Khawzawl, Saitual leh Hnahthial-ah te hun reilote-ah DTO Office hawn theih a beisei thu sawiin thawktute chu tunlai khawvel thiamna hmang tangkai zel tur leh mipuite pawh dan bawhchhe lova a hun taka lirthei document te update tha a, chhiah pe thin tur leh nu leh pate pawhin kan fate kum an tlin hma chu lirthei khalhtir lo turin a chah a. Sorkar kum kalta-a chhiah kan hmuh Crore 50 vel zet hai luttu Transport Department-a thawktute inpekna fakin dikna leh rinawmna nena an hna chanpual theuhte tha taka thawk zel turin a chah a ni.

Khuallian hian 'Transport Lamtluang' tih Souvenir a tlangzarh nghal bawk.

Er. R. Lalrammawia, Director, Transport Department chuan mipuite tana a awlsam zawk nan thawktute chu Online Services pe tam turin a chah a. Kum thum kalta atang khan Contractor leh Supplier te-ah ba nei lovin kan awm thei a, hei hi thil lawmawm tak a ni tiin kumin Sorkar kum chhung hian cheng Nuai 5000 revenue hmu turin Transport Department chu beisei kan ni bawk a, theihtawpa kan tan a tul a ni a ti. Pu F. Lalzuithanga, President MTWA pawhin he hunah hian thu an sawi bawk.

Vawiin General Assembly hi hun hnihah then niin hun khatna hi Pu F. Lalzuithanga, President, MTWA chuan kaihruaiin Pension thlahna, Member thi-te sunna, hruaitu thlanna leh rorel neih anih bakah Pensioner te atanga thusawi leh sum dinhmun report te ngaihthlak a ni a. Hun hnihna hi Pu Zothangzuala Chhangte, Vice President, MTWA chuan kaihruaiin Pu R. Lalbiak Dika, General Secretary, MTWA chuan report a pe a. Pu C. Lalthlengliana, Financial Secretary, MTWA chuan lawmthu a sawi a ni. Tlai lamah chawhlui kilho nghal a ni bawk.