480/2023-2024

Lunglei the 17th May, 2023 – Lunglei District huamchhunga Ruihhlo Do kawnga beihpui thlak dan tur ngaihtuahin vawiin chawhnu khan Lunglei DC Conference Hall-ah Bawrhsap Pi Ramdinliani kaihhruaiin meeting neih a ni.

He meeting-ah hian sawrkar official-te, Juvenile Justice Board leh Child Welfare Committee hotute, Zirna In hrang hranga NSS Programme Officer-te, Special Juvenile Police Unit-te, kohhran hruaitute, Southern Market Association hruaitute, VC Association hotute leh tlawmngai pawl hrang hrang aiawhte koh an ni.

Lunglei District huamchhunga Ruihhlo Do kawnga beihpui thlakna tur hian sawrkar atangin cheng nuai sarih (7) fund dawn a ni a. He Fund hi a tangkai thei ang bera hman anih theihnan Committee hian ngaihtuahna a seng a. Lunglei District-ah middle school zirlai rual naupangah ruihhlo ti tan an tam hle tih meeting-ah hian report niin school,college leh kohhran kaltlangin ngawrh takin awareness campaign neih hi se an ti a. Awareness campaign leh hmalak dan tur dangte chipchiar taka lo duang tur hian Core Committee din niin he Committee hi an thukhawm leh dawn a ni.

Social Welfare & Tribal Affairs Department hnuaia Mizoram Social Defence & Rehabilitation Board-in District 8-a Middle School (M/S) 77, High School (H/S) 33 leh Higher Secondary School (HSS) 12-a zirlai 10,746 kum 10-17 inkârten ruih theih thil an tih dân chungchâng an zir chianna December 2022 a tlangzarh ‘Survey Report on Children and Drugs in Mizoram 2022’ in a tlarlan danin:

* Naupang school kal lai mek leh kal tawh lo (school dropout) te pawhin ruihhlo hi an lo hmelhriat hle tawh a.

* Naupang ruihhlo tih tan kumte pawh a kum telin a hniam chho zel a ni.

* Naupang school kal chhunzawm lo (school dropout) thenkhatte chu ruihhlo an khawih vang a ni tlangpui a. Ruihhlo chak zawkah lut chhovin an tih tam mai bakah a zing tial tial a ni.

* Zirchianna atanga lan danin naupang ruihhlo ti thin te zingah rilru lam kaihhnawih harsatna (inattention, anxiety leh depression, etc) a tam phah ni a hriat a ni a. Khawvel pum huap pawhin ruihhlo hmansual leh rilru lam kaihhnawih harsatna hian inkungkaihna a nei nia hriat a ni.