479/2023-2024
Aizawl the 17th May, 2023 : Vawiin khan School Education Department buatsaih Consultative meeting on implementation of NEP 2020 chu Mizoram Rural Bank Conference Hall, MINECO-ah neih a ni a, School Education Minister Pu Lalchhandama Ralte-in he meeting hi a kaihruai.
School Minister Pu Lalchhandama Ralte chuan he meeting-ah hian thusawiin NEP 2020 chu launch a nih hlimah Covid-in min tihbuai lai a ni naa, a theih ang angin bawhzui nghal a ni a ti a, zirna lama mithiamte awmna Group of expert te, task force te leh study group te din a ni a, NEP 2020 rawtna bawhzui dan turte an duang a ni a ti. NEP 2020-in rawtna a rawn siamah hian sorkar hi thui tak kalpui tawh a ni a, zaa 25 bawr vel hi chu tihhlawhtlin a ni hial tawh mai awm mang e tih tur a ni a ti a. Mizoramah hian kohhran, tlawmngai pawl leh khawtlang hruaitute nena thawhhona a țha a, policy mumal tak neia kal zel dawn chuan țanho țhat zel a ngai dawn a ni a ti bawk. NEP 2020-ah hian mahni hnamzia Nationalism inzirtir theihna tur kawng a hawng zau viauin a lang a, Pathianin Mizote hi hnamah a siam a, he policy tihhlawhtlinnaah hian Mizo hnam nihna hi a laimuah dah a ngai tih sorkarin a ngai pawimawh a ni a ti bawk.
School Education Secretary Dr. Lalzirmawia Chhangte chuan NEP 2020-in zirna kalpui dan tur a tarlan țhenkhat a sawi a. School stage hrang hrangte chu inenkawlna hrang thliaha awm lova kaihkawp a remchan dante, NEP hian khawsakhonaah lehkha chhiar chu nunphung atana hman tur a nih dante a rawn tarlang a, school level-ah pawh library dah a ngai pawimawh hle a, lehkha chhiar nunphungah min hnuhluh hi a tum a ni a ti. Language policy pawh tihhlawhtlin kawngah hmabak a la awm a, Pawl 3, 5 leh 8 ah te naupangten an zirchhuah tur chu an zirchhuak em tih te pawh tehchhuah a ngai pawimawh a ni a ti bawk.
He consultation meeting-ah hian Pi Laldawngliani Chawngthu Director, SCERT-in NEP 2020 rawtna tihhlawhtlin tawh leh hmabak pawimawh zual a sawi a, NEP 2020 umzuitu tur Group of Expert te, task force te leh study group te bakah kum 2021-ah NCF atan Committee hrang hrang din a ni a ti a. Early Child Care and Education (ECCE) chu țan nghal a ni a, pre-school 433 din tawh a ni a, Diksha portal hmangin zirtirtu 2673 te training pek an ni a, Anganwadi zirtirtu 800 training pek an ni bawk a. Pre-school zir turte pawh siam a ni a, NEP rawtna Bilingual textbook te pawh siam a ni der tawh a, Braille text book te leh large print text book te pawh siam a ni a ti.
Pi Caroline Rinthanpuii Fanai, Dy. SPD Samagra Shiksha chuan NIPUN Bharat Mission Mizorama tihhlawhtlin tawh leh hmabak awmte a sawi bawk a, kalkhawmte hian sawihona hun an hmang bawk.
He consultation meeting-ah hian School Education Department Secretary leh Director te, MBSE chairman leh SCERT Director te, SPD Samagra Shiksha te leh Department officer te, service association hruaitute an tel a ni.
Attachment
- Loading attachment...
