Vawiin chawhnu khan Secretariat Conference Hall-ah Social Welfare Secretary Pi K. Vanlalrawni hovin ruihhlo dona chungchanga inrawnkhawmna ‘Consultative Meeting on Drug Prevention Module for Mizoram’ neih a ni.

Social Welfare Secretary Pi K. Vanlalrawni chuan ruihhlo dona kawnga hlawhtling tur chuan kohhran, NGO leh mipuite thawhho that a ngaih thu a sawi a. Mizoram Social Defence & Rehabilitation Board (MSD&RB) CEO, Pi Lalhlupuii Sailo chuan naupang leh thalaite tana ruihhlo dona leh ruihhlo laka venhimna module chu duanchhuah a ni a, hemi hi mi thiam tak tak nen inrawnkhawmna hun hrang hrang neih a nih hnuah NIMHANS, Bangalore-ah thawn a ni dawn a, chumi hnuah chuan kalpui tan a ni dawn a ni tiin master trainer atan kohhran mi leh sa te, khawtlanga mi tangkai tak tak te leh zirtirtu te hman tum a ni, a ti.

MSD&RB Facilitator Pi Vanlalhruaii chuan Drugs Intervention Prevention in Mizoram tih thupui hmangin presentation a pe a. Presentation-ah hian Social Welfare Department in zirchianna a lo neih tawh hmangin thalaiten ruihhlo an khawih tan hun te, ruihhlo hrang hrang an khawih chhoh dan te leh hemi hriatna hmanga venhimna kalpui dan tur te tarlan a ni a. Hemi hnu hian kalkhawmte chuan inrawnkhawmna neih zui nghal a ni a, ruihhlo laka thalaite fihlim dan tur te, district hrang hranga kalpui dan tur te, kohhran leh NGO thawhho dan tur te, harsatna awm thei te sawi hona neih a ni.  

Drug Prevention Module hi then hran niin main module-ah chuan ruihhlo awmzia leh hrilhfiahna te, inven theih dan te, enkawlna in awmzia a neih theihzia te tarlan a ni a, sub-module-ah chuan primary level, middle school level, high school & higher school level, college level leh thalai school kal tawh lo thlengin ruihhlo laka an fihlim theih nan zirtirna kalpui dan tur te, nu leh pa pawimawhna te dah a ni a, module-ah hian uar leh zuala chhungkaw pawimawhna tarlan tum a ni.  IEC (Information, Education and Communication Campaign) pawh social media, pamphlet leh poster hmanga kalpui tum a ni.