Vawiin khan Leikapui Hall, Hotel Floria-ah Social Welfare Department buatsaih Mizoram chhunga ruihtheihthil leh a kaihhnawih lama mithiamte inrawnkhawmna ‘Consultation Workshop for Experts on Drug Prevention Services in Mizoram’ neih a ni a. Ni hnih (23rd -24th November) chhung a awh dawn a ni.

Khuallian Social Welfare Secretary Pi K. Vanlalrawni chuan Mizorama thalai tam tak tibuaitu ruihhlo chungchanga inrawnkhawmna hun tha neih a ni chu lawmawm a tih thu a sawi a. Zirchiannaah chuan thalaite hi ruihtheihthilin an inchiu nghal mai lova, vaihlo, zu leh ganja atangin drugs hlauhawm lehzualah an tuan ta thin a ni, a ti a. National HIV Programme atang hian drugs hmanga inchiu zat hriat theih mahse an drugs hman ber leh an hman dan hriat a har hle a, workshop hian hemi kawngah hian min puih ngei kan beisei a ni, a ti a. Workshop neih a nih hnuah master trainers training neih a ni leh dawn a, chungte chuan district hrang hranga worker-te training an pe leh dawn a ni, a ti a. Field Worker-te phei chuan khawtlang leh sikulah kawng hrang hrangin hma an la dawn bawk a ni, a ti.  Ruihtheihthil dona kawnga hlawhtling tur chuan department hrang hrang, NGO leh mipuite thawhho that a ngaih thu a tarlang tel a ni.

Workshop-ah hian ruihhlo vanga Mizoramin harsatna kan neihte sawi ho a ni a, ruihhlo dona kawnga inkaihhruaina Module-Mizoram Addiction Prevention Programme (MAPP) duanchhuah niin hemi hmang hian training of trainers pawh buatsaih a ni dawn a ni. Dr.Pratima Murthy, Professor of Psychiatry leh Head, Centre for Addiction Medicine, NIMHANS, Bangalore chu resource person atan hman a ni.

Workshop hawnna hun hi Social Welfare Director Pi Laldikkimi chuan a kaihruai a, Dr.Pratima Murthy chuan thusawina hun a nei a. Social Welfare Asst. Director Pi Chuauzikpuii chuan lawmthu sawina in hun a khar a ni.