Vawiin khan Mizoram Chief Electoral Officer Pu Ashish Kundra, IAS chuan chanchinthar lakhamtute, state chhung leh pawna mite chu State Media Centre-ah ‘Press Meet’ a neihpui a. Tun dinhmunah Tripura Camp-a awm Bru voter-te tana Kanhmun-a polling booth an siam mek te leh inthlan kaihhnawih thilah sorkar inbuatsaihna leh hmalakna kal zel chungchang hrilhin press mite zawhna hrang hrang a chhang bawk a ni. 

Mizoram CEO Pu Ashish Kundra chuan Election Commission of India duhdanin Bru (Reang) voter Tripur Transit camp a awm ten vote an thlak theih nan Kanhmun, Mamit District ah an vote thlakna tur bik Special Polling station sawm leh panga (15) siam a ni ang tih a sawi a. November ni 20 khan amah ngeiin a hmunah inbuatsaihna kal mekte a va thlithlai thu leh kanhmun YMA leh mipuiten sorkar hmalakna an thlawp that dan a hmuh chuan a tilawm hle thu pawh a sawi. Mizoram CEO chuan Tripura lam pawh tlawhin Bru Camp awmna te, an state officials te pawh a kawm thu leh Tripura CEO nen pawh an inbiakpawh reng thu a sawi bawk. An awmna Camp atanga kanhmun rawn phurh thlen dan tur motor leh thildangte tunah hian enfiahna (assessment) tih mek a nih thu sawiin CEO chuan a tul ang zelin sorkar chuan hmalak a inhuam thu a sawi. ECI-in November ni 23 hmain Bru elector Tripura Camp-a awm mekte chuan Photo Voter Slip an nei tur a ni a tih angin naktuk leh a tuk leh (ni 2) chhungin tihfel vek a nih beisei a ni a ti a; he Slip-ah hian vote an thlakna tur Special Polling Station chiang takin a chuang dawn a ni. 

Chanchinbumiten Candidate criminal case nei tawh thin leh nei mekte chuan Mizorama chanchinbu darhzau ni lo, a tenau zawkah chauh an chhuah thu chungchanga an zawhna chhangin CEO chuan a tul chuan Election lamin ECI Guidelines-in a phut ang ngeia zawm turin hriattir an ni leh vek ang, a ti. High Court-ah Bru chungchanga PIL thehluh a nih vangin inthlan ni (election date) tihdanglam a nih a rin loh thu a sawi bawk a. Nimina ZPM-in a hnena MNF pamphlet chungchanga complaint an thehluh bawhzuiin MNF Party-te chu ‘showcause notice’ pek an ni a, chumi chhanna leh an insawifiahna chu MNF lamin vawiin chawhnu khan a hnenah an rawn thehlut veleh tawh thu a sawi a; CEO chuan an chhanna lehkha rawn thehluhte uluk taka zirchian a nih hnuah Dan angin hmalak a nih tur thu a sawi bawk. Tun hnaia JT. CEO transfer a nih thuah engmah buaina dang awm vang ni lovin state sorkar inrelbawlna kal zel chauh a nih thu leh, Addl CEO 2 lai an awm mai bakah tun dinhmunah chuan inthlanna kaihhnawih thil leh inbuatsaihna a zo thawhkhat tawh a, RO-te kutah engkim mawhphurhna tam zawk a awm tawh avangin sorkar chuan Jt. CEO chu post tharah a sawnchhuak ta a ni a ti. 

Election Commission of India chuan Bru (Reang) voter Tripura Transit Camp-a awm ten vote an thlakna tur Kanhmun, Mamit District-ah Special Polling Station 15 siam dan tur leh a kaihhnawih thildang chungchanga ruahmanna a rawn siamte chu a hnuaia mi ang hi a ni :

 Transit Camp-a awm Elector-te hming hi vote an thlakna tur Assembly Constituency chhunga Polling Station-ah an hming hi ziahluh a ni a, chutiang zel chuan Kanhmun-ah pawh hian voter-te Assembly Constituency inziahluhna azirin Polling Station/Booth hrang hrang ruahman zel a ni ang. 

Heng Special Polling Station pakhatah hian Elector 1200 aia tam awm theih a ni lovang. Special Polling Station-ah hian polling station an huam chin chiang taka tarlan tur a ni ang. Transit camp-a Bru awmte hnenah hian mi pakhat tan Special polling station pakhat zela vote thlak tura ruahman a ni ang a, mi pakhatin special polling station pakhat aia tamah vote a thlak thei lovang. 

DEO ten Sector Magistrate/Sector Officer an ruatte kaltlangin Kanhmunah Special Polling station tha taka din a ni ngei a ni tih an enpui tur a ni. EVM leh VVPAT hmanga vote hi thlak tur a ni ang a, Sector Officer ten 100% EVM-VVPAT reserve an kawl tur a ni bawk ang. 

Special Polling station-ah hian Polling official leh buaipuitu tur zawng zawngte hi an awmna district atang theuha thlanchhuah an ni ang a. Nodal Officer, Deputy Secretary aia hniamlo in heng hna kalpui dante hi a enpui tur a ni a, Special Polling Station-a duty tur Polling party te chu Observer awm laiin an duty dan tur ‘randomization’ tih a ni ang. 

Returning Officer-in electoral a buatsaih anga, Marked copy leh Working copy a hranga siam a ni ang, hetiang hian; 

A) Polling station awmsa a tih dan tur : A lem awm palh thei ven nan, Bru camp a awm mekte Electoral roll a an chanchin ziahnaah chuan, pen tui pawl hmangin “Camp” tih chhut kai tur a ni ang. Returning Officer chuan AC electoral roll a chhinchhiahna chhut kai leh kai loh chu kut ziakin chiangin a dah tur a ni. Bru elector chhinchhiahna chhutte chu Polling Station pangaiah vote thlak phal an ni lovang. 

B) Special Polling Station a tih dan tur : Kanhmun-a hman tur RO endik sa leh stamp chhut kai ngei Electoral roll siam tur a ni ang. Awlsam zawka Elector ten vote an thlak theih nan Polling party-te chuan Elector hming leh Serial number hmangin felfai takin an thliar hrang tur a ni. Special Polling Station-a elector vote thlak turte enpui turin DEO chuan Special Booth Level Officer a ruat tur a ni a,  Bru Consolidated List an kawl ve tur a ni bawk ang. Bru elector, Transit camp-a cheng mekte chauhin vote an thlak tur a ni. ECI thupek angin Special Polling Station 15 ah hian zing dar 7 : 00 atanga tlai dar 3 : 00 inkarah vote thlak zawh fel vek tur a ni.