661/2025-2026

Aizawl, the 17th May 2025: Nimin ni 16.5.2025 (Zirtawpni) tlai khan Chief Minister Office-ah Chief Minister Pu Lalduhoma leh Social Welfare Minister Pi Lalrinpuii te chuan Mizorama ruihhlo hluar zel dona chungchang leh ruihhlo ngaite enkawlna chungchang sawiin inkawmna an nei a. Social Welfare Minister hi a Department officer ten an tawiawm.

Social Welfare lam hian an hmalak mekna te leh an hmachhawp te sawifiahna (presentation) an pe a. Mizorama Ruihhlo ngai enkawlna Integrated Rehabilitation Center for Addicts (IRCAS) 11 te tihlenna tur te, hetiang center la awm lohna District 5 (panga) Saitual, Khawzawl, Hnahthial, Lawngtlai leh Mamit a din ve na tura Ministry of Tribal Affairs a funding an zawn mek thu te, Thingsulthliaha Multi-Disciplinary Treatment & Training Center din tur chungchang leh Jordan Center kalpui dan tur te an sawi.

Chief Minister chuan, ruihhlo ngai center-a awm te an dam chhuah tak tak theih nan After-care skill development ngaih pawimawh a tul thu leh Jordan Center pawh thiamthil an zir nghalna hmuna siam a that thu sawiin, hma lo la nghal turin a chah a. TNT te leh kohhranin a enkawl De-addiction Center te pawhin skill development program hi an kalpui theih dawn chuan a tul anga sawrkarin Grant in Aid pek a inhuam thu a sawi a. Hemi kawngah hian SWD Minister hian hma a lak nghal tur thu Chief Minister hi a hrilh a ni.

TBCC chungchang pawh an sawi dun a. Pi Lalrinpuii hian, sawrkar kaihhruaina hnuaiah an enkawl zawh tawk damlote admit a, mumal zawka kohhran leh khawtlang hruaitute nen thawkho chunga an kalpui dan tur a sawipui tur thu a sawi a ni.

Nimin chawhnuah vek khan SWD Minister hian kohhran hrang hrang hotute leh NGO CYMA, MUP, MKHC, CCM te kawmna a nei a. The Mizoram Drug (Controlled Substance) Act, 2016 leh The Mizoram  Drug Treatment-cum Rehabilitation Center Accreditation Rules, 2019 leh a hnuaia guidelines te chu zawma center zawng zawng ten sawrkara an inziah luh vek a tul thu hrilhin, a inziak lut te chu sawrrkarin puih an tum dan te pawh a hrilh a. Ruihhlo ngaite enkawlna leh a invenna lama anmahni zawn theuh a tan la tura ngenin, thawhpuiah a sawm a ni.

Inkawmnaah hian kohhran lam atangin PCI, BCM, Salvation Army, Seventh Day Adventist, IKK aiawh te an tel a, ruihhlo hluar zel leh ruihhlo ngai pung zel chu pawi an tih thu leh an ngaimawh thu sawiin, a theih ang ang a hma lak tul an ti tlang a. Ruihhlo ngai enkawl dam hi thil harsa tak anih avangin Pathian thu leh kohhran behchhana kal a tul thu sawi lan niin, a invenna lamah kohhran ten awareness/inzirtirna nasa zawka kalpui ni se an ti.