Vawiin hian Health and Family Welfare Minister Pu Lal Thanzara chuan St. Peter’s Higher Secondary School Hall, Chhingchhip a Er. C. Lianthangpuia Memorial Proficiency Cash Award semnaah khuallian niin a hman pui a. Zirlai naupang kalkhawmte chu ruihhlo leh mipat hmeichhiatna hman khawlohna kawng tinrengah fihlim tlat turin a chah.

Pu Lal Thanzara chuan, Mizoram chu Missionary te zarah Roman Script hmanga lehkha zir chho kan nih thu sawiin, chu chu Chanchintha vanga kan neih a ni a, a hlu em em a ni, a ti a. Zirna quality tha leh tunlai zawk min chhawp hmasa tute chu Roman Catholic Kohhran te an ni bawk a, he kohhran hian kan ram tan zirnaah tha an thawh hlawk hle a ni, a ti. Chanchintha avanga hetiang dinhmun thleng thei kan nih mek laiin zuk leh hmuam leh ruihhlo avangin Mizoram hming a chhe zawngin a thang vel mek a, India rama zuk leh hmuam ti tamna ber, Cancer vei tamna ber leh HIV pai tam ber pahnihna kan ni mek a ni. Hman deuh kha chuan Drugs vangin HIV kan ramah a darh nasa thin a, vawiinah chuan mipat hmeichhiatna hman khawloh vangin he natna hi a darh nasa hle ta thung. Heng thil thalote lakah hian fihlim ila, mal min sawmtu Pathian chawimawiin mawi taka nun i tum theuh ang u, a tia. Aia upa zah nachang hre thar turin a chah bawk.

Minister chuan, zirna hi pass ngawr ngawr tawk vel leka tih ve mai mai theih a ni a, amaherawh chu tunlai khawvel inelna sang tawh taka dam khawchhuak tur leh Delhi leh khawpui lian zawka zirna in thaa lut tur chuan nasa taka kan beih a tul tawh a ni a ti a. Central Service ah Mizo tling an tlem tak em avangin hun engemawti chhung chu Chief Secretary tur Mizo kan nghei a ngai dawn a ni, a ti. Chutih laiin Vocational Course lama kal nachang hre turin zirlai naupangte a chah bawk a, Mizoram Youth Commission kaltlang thalai 3000 vel zetin hna an hmuh tawh thu a tarlang bawk.

Pi Sangthanmawiin a pasal Er. C. Lianthangpuia kum 2013 a boral ta hriatreng nana Chhingchhing khuaa High School Exama ti thate chawimawina hun buatsaih nachang a hria chu lawmawm a tih thu sawiin, nu fing tak nia a hriat thu a sawi a ni. Minister hian Judith Lalchanpuii, St Peter Higher Secondary School atanga kumin HSLC a Distinction a Pass a, Subject zawng zawnga letter hmutu hnenah leh Government Chhingchhip High School atanga HSLC Second Division a pass Sanglawmawma hnenah Er. C. Lianthangpuia Memorial Proficiency Cash Award hi a hlan a. Tin, Minister tawiawmtu Pi Lalhmingthangi, Councillor, AMC chuan kumin veka St Peter HSS atanga HSSLC Science Stream a Mizoram puma 7 na Malsawmzuala Royte hnenah St Peter School Alumni in chawimawina Citation an siam sak chu a hlan bawk.

Pu Lal Thanzara hian zing lamah Chhingchhipa Health Department hmunhma te a enkual nghal bawk a, khawtlang hruaitute leh thawktuten an harsatna an sawite a theih anga a en zui tur thu a hrilh hlawm ani.

Vawiina zirlai ti thate chawimawinaah hian St Peters Higher Secondary School Principal Brother Paulous bakah K. Lalhmachhuani, Headmistress, Government Chhingchhip High School leh Chhingchhip Citizens Welfare aiawhin Pu Patrick Zathuama ten thusawina hun an hmang a, zirlai naupangten zai leh lam, mawi tak takin an entir bawk a ni.