Committee on Local Fund Accounts (COLFA) chuan vawiin khan 13th Finance Commission Grant (2014-2015) hnuaia Aizawl Municipal Corporation hnuaia Ward X leh XI-a hnathawhte a hmunah kalin an enfiah. He Committee-ah hian Pu John Siamkunga chu Chairman niin, Member te chu Pu Vanlalzawma, Pu T. Sangkunga, Pu Lalthanliana, Pu R. Vanlalvena, Er. Lalrinawma leh Pi Vanlalawmpuii Chawngthu te an ni. COLFA hi CAG-in State tina Local Fund Accounts sum hman dan enfiah tura Committee din tura Sorkar laipuiah rawtna a thlen angin Mizoramah nikum March 2015 khan din a ni.

Committee Chairman Pu John Siamkunga chuan Accounts & Treasuries Department hnuaia Local Audit Fund tena tualchhunga roreltu - AMC, Local Council, Village Council leh Autonomous District Council hnuaia hmalakna hnathawhte chu an sum hmuh nen a inmil em tih te enfiah a zirchiang turin Committee on Local Fund Accounts member te chu an fehchhuah thin thu a sawi a. Thil tihsual hailan emaw, tih diklo laite chhui turin emaw a kal an nihloh thu sawiin, Chairman chuan hmasawnna leh mipui tana ro siamna tur sum, tualchhuang roreltu te hnenah pek hi anih dan leh a hman dan tur ang taka hman a ni em tih, audit findings-a tarlan te enchian chu an hna a nih thu a sawi a. Hmasawn tur chuan khauh deuh hlek a kal a ngaih chang a awm thin thu sawiin, Sorkar hnathawkte pawh fimkhur turin a chah a. Local Fund hnuaia hnathawhte hi a tir atangin thahnemngai tak chungin enpui thin tura a beisei thu a sawi bawk.

Vawiin hian Tanhril, Sakawrtuichhun, Tuivamit, Chawlhmun, Luangmual, Zonuam, Govt. Complex, Zotlang leh Chawnpui a footpath, zun-in, step, tui luan kawr, kawng siam leh hnathawh dangte enfiah a ni a. Assembly Committee hi Assembly a thawk Officer thenkhatte, UD&PA leh AMC atangin Officer leh Engineer ten an tawiawm a ni.