Vawiin khan Chief Secretary Pu Lalmalsawma IAS hovin UN Joint Initiative in Mizoram Steering Committee chu Secretariat conference hall-ah a vawi thumna atan an thu khawm a. UN Joint Initiative hnuaia Mizoram sorkar leh UN Agencies 4 te hma lakna kalpui chhunzawmna tur pawimawh tak tak an sawi ho a ni.

Vawiin meetingah hian UN Agencies 4 - UNDP, UNIDO, FAO leh ILO ten October 16, 2014 a Mizoram sorkar nen thawh hona thuthlung, MoU an ziah atanga hma an lak dan tlangpui thlir letna neih a ni a. Heng hmalakna chhunzawmna tura ruahmanna hrang hrang ah hian thalai te tana skill development leh capacity building atan ILO in ruahmanna a siam te, Mizoram thlai thar sawngbawl leh hralhna tura UNDP in consultant a rawih thar, YES Bank ten ruahmanna an siam te, Mau chin leh mau hmanga sumdawnna kalpuina tura UNIDO ruahmanna siam te, vawk natna PRRS hri leng enkawl leh khuahkhirhna tura FAO ruahmanna siam tawh kalpui dan te sawi ho a ni.

Chief Secretary chuan Mizoram sorkar leh UN Agencies 4 ten thawh hona thuthlung an ziah atanga heng Agencies ten Mizorama hna an thawh dan leh hmasawnna an thlen tawh chin chu lawmawm a ti a. FAO leh Mizoram University hmalakna hnuaia MiSALT project chuan hma a sawn hle tih sawiin tlangram loneitu ten an tangkai puiin AMFU pawhin tha a ti hle tih a tarlang a. ILO in skill development kalpuina tura ruahmanna a duan chu tha a tih thu sawiin kum 1972 a Mizoram Union Territory a nih atangin hetiang taka skill-gap assessment leh unemployment chungchang thuk taka zirchianna neih hmasa ber a ni, a ti a. An ruahfmanna duan te hlawhtling takna kalpui a nih theih nan Mizoram sorkar chuan theihtawp a chhuah tur thu a sawi.

Vawiin meeting ah hian NIB Vice Chairman Pu P.L.Thanga’n mau hmanga eizawnna leh sumdawnna tura ruahmanna a sawifiah a. Market Task Force hmalakna tura consultant rawih thar YES Bank ten agri-horticulture thlai thlan chhuah 5 atana ruahmanna an siam te an sawifiah bawk a. Meetingah hian Mizoram sorkar aiawhin Chief Secretary bakah NLUP Implementing Board hotute leh department pawimawh 10 aiawhte an tel a. UN Team aiawhin Pi Ayumi Fujino, UNIDO Representative in India leh UN Agencies 4 aiawh te bakah Mizorama UN Programme Co-ordinator leh YES Bank aiawhte an tel a ni.