Vawiin Chawhma Dar 10:00am khan Green Mizoram Day 2016 Serchhip District a hmandan tur ngaihtuahin District Level Committee on Green Mizoram chu DC Conference Hall ah District Bawrhsap leh Chairman ni bawk Dr Lalrozama IAS hovin an thukhawm.

Vawiin a District Level Committee-ah hian State Level in Green Mizoram Day 2016 hawnna hun Serchhip District chhung Thenzawl khuaah Dt 11th June 2016 ah Pu Lal Thanhawla, Chairman, State Level Committee leh Chief Minister ni bawk hova hman tur anih avangin Ditrict Level ang chuan a huhova hman loh nise an ti a, State Level Green Mizoram Day 2016 hawnna hun Thenzawl khuaa neih turah hian Serchhip a sawrkar Officialte tel thlak vek nise an ti. Hetihlai hian Forest & Enviroment Department te hmalakna in Serchhip District Level ah pawh Thenzawl leh N.Vanlaiphai Division huam chhunga Sawrkar Department hrang hrang ten kum kal ta Green Mizoram Day puala thing tiak an lo phun tawh, Department tinten an chan theuhte chu samfai leh hung that ngaite hung zui leh tur tiin, thingtiak phun belh emaw phun that ngaite a awm chuan phun leh tur a ni ang.

Heng bakah hian Green Mizoram Day 2016 ah hian Local Adminstration Department Serchhipte enkawl Dawngzawl a District Park ah Thingtiak 50 leh District Jail Campus, Chhiahtlangah thingtiak thahnem tak phun leh tur a ruahman a ni bawk a, heng thingtiak te leh a hungna tur mau te hi Forest & Enviroment Department,Thenzawl Division ten an ngaihtuah dawn a ni.

Vawiina District Level Green Mizoram Day Meetingah hian , thing leh Mau leh Nungchate humhalhna kawnga Sawrkar leh YMA ten thawhona tha an neih chhoh zel dan tur te, Branch YMA hrang hrangten Luidung an humhalh kawnga Dan leh hrai lama harsatna an tawh thinte chu Dan kengkawhtute leh Police lamte nen ngaihtuahho nise tin an rel bawk.

Vawiina District Level Green Mizoram Day 2016 meetingah hian Kum kalta “ Green Mizorm Day 2015” a District Level hmalakna te pawh thlirlet nghal niin Pu Lallianzuala, Member Secretary District Level Committee leh Divisional Forest Officer, Thenzawl report atangin Serchhip District ah thingtiak 8625 phun niin heng zinga za sawmsarih (70%) te chu tha taka an nung chhoh thu ngaihthlak a ni a, Mizoram pumpuiah thingtiak 44,00,520 (Nuai sawmli pali leh zanga sawmhnih) phun anih tawh thu leh Serchhip Districtah pawh thingtiak 2,15,679 (Nuai hnih singkhat sangnga zaruk sawmsarih pakua ) phun a nih tawh thu tarlan a ni bawk.

Vawiina District Level Green Mizoram Day Meetingah hian kum kalta a committee ten an lo rel tawh ramkang venhimna kawnga titha lawmman dawng tur te thlanna neih nghal ani.