Excise & Narcotics Minister Dr.K.Beichhua an vawiin khan Vairengte Jt.YMA playground ah ruihhlo cheng 14,93,362 man hu a hal ral.

Minister chuan Mizo te hmelma lian tak ruihhlo tawlhruk ching te tan Mizoram ah hmun a awmlo ani tiin ruihhlo do na kawngah Sawrkar chu theihtawp chhuahpui turin mipuite a sawm a ni. Mizo thalai tam tak nunna suattu ruihhlo hi huat na chang kan hriat loh chuan Hnam vanduai kan ni dawn ani tiin ruihhlo chu Department pakhat do ngawt chi a nilo a, Ram neitu Mizo mipuite hian kan Do tlan a ngai ani ati. Mizo society ah Social Security kan dah pawimawh a ngai ani tiin Dr.K.Beichhua chuan ruihhlo do chu Chief Minister pawhin top priority a a neih thu tarlangin tlawmngai pawl YMA leh kohhran thawhpuina in theihtawp an chhuah zel dawn a, Excise Department thuamchak turin Sawrkar in hma a la chho mek zel ani ati a, ruihhlo bawiha tang mek thalai tamtak chhanchhuah hna thawk turin Social Welfare Department pawhin nasa takin hma ala chho mek zel ani a ti.

Minister hian Vairengte Excise & Narcotics Department check gate leh Office a tlawh a, hetah hian Sawrkarin Ruihhlo lakah indona a puan thu sawiin hmelma lian chu kan huat rawn a, ka do a ngai ani tiin mizo mipuite kan tan ho chuan hnehna kan chang thei ani a ti. Kan Rama Social Security dinhmun en in lungawi har a tih thu a sawi a, ruihhlo dona kawnga thawktu department mi leh sa te chu an pawimawh hle ani tiin an hnathawh chu Pathian rawngbawlna ah ngaiin rinawm taka thawk zel turin a chah a ni.

Hemi bakah hian AH&VETY Department Office leh ram a tlawh bawka, a hna chanpuala Department hrang hrang harsatna leh hnathawh kalphung te pawh an sawiho a ni.

Ruihhlo hal ral hi Vairengte Jt.YMA hmalakna a man an ni a, Damdawi Heroin cap 226, NAP 110 Strip, Alprozolam 15 strip bakah Sap zu um 268 leh beer can 54 bakah rakzu thahnem tak an ni a, hemi bakah hian ganja leh dawidim a tel bawk a ni.

END Minister hi END Commissioner Pu KT Beicho,IRAS,  Pu R.Lalngheta CYMA Vice President Kumpuan Committee  Chairman ni bawk leh Official hrang hrang ten an tawiawm a ni.