Vawiin khan Directorate of A.H & Vety Meeting Room-ah Foot and Mouth Disease (FMD) Training of Trainers neih a ni. Training hi Dr.Lalnuntluanga Colney, Joint Director (Livestock Health) chuan a kaihruai a, Dr. K.C. Roduhawma, Additional Director (VS&PH) in training-a kalte lawmna leh fuihna thu a sawi a. Dr. Esther Lalzoliani, Veterinary Officer (DI Lab.) chuan Power Point Presentation hmangin Foot and Mouth Disease (Ran Ke Na Hri) leh Brucellosis Vaccination chung chang zirtirna a pe a ni.

He training-ah hian A.H. & Veterinary Department hnuaia District Officer-te leh Chief Veterinary Officer-te an tel a ni. 

A.H. & Veterinary Department chuan sawrkar laipui programme anga Foot and Mouth Disease (FMD) leh Brucellosis te Mizoram atanga umbo a nih ngei theih nan Mizorama ranvulhtute leh Mizo mipui zawng zawng an hmalaknaa tawiawm a, an rante hridanna (vaccine) pek tir theuh turin an ngenin an sawm a ni.

Food and Mouth Disease hi India ram pumah kum 2025-ah chuan khuahkhirh (control) vek a, kum 2030-ah phei chuan Animal Disease Control Programme chuan India ram atanga awm tawh miah lo turin vaccination hmanga umbo (eradicate) a tum a ni. Foot and Mouth Disease atana hridanna pe tur hian ran ke na hri vei thei zawng zawng - bawng, sial, lawi, vawk, kel leh beram te zaa za (100%) FMD Vaccine pek vek tur a ni. FMD Vaccine hi India ram pumah a ruala pek vek tur a ni a, kum tin vawihnih (thlaruk dan zelah) pek tur a ni.

Brucellosis Vaccine chu bawng/sial/lawite-ah a note, a nu (female) thla 4 atanga thla 8-a upaah pek tur a ni a, an damchhungin vawi khat pek tur a ni.