Vawiin khan School Education Minister Pu Lalchhandama Ralte chuan khuallian niin Hrangbana College Week Closing Function, an College Golden Hall-ah a hmanpui. 

Pu Lalchhandama Ralte chuan tunlai khawvel kalphung tharah thalaite tan dam khawchhuak turin political fitness a tangkai tawh lova, a tak taka fit nih a ngai tawh a ti a, mipui pawhin kan rilru puthmang kan thlak a tul tawh a, political fitness atanga luh tum phet an la awm thin a, tunlai khawvel kalphung tharah chuan thil theih a ni tawh lo a ti a. A thiam chu an tling mai dawn a, School Education Deparment a thawk tur mi sangkhat dawn an lak mekah pawh a thiam leh tha chu an tling mai dawn a ni a ti bawk. 

Minister chuan hun vawn that leh vawn dik pawimawhzia sawiin Zoram thalaite hi a hun taka engkim ti thei tura inbuatsaih a ngai tawh a, hun vawn dik a, vawn that a pawimawh tawh, hun vawng tha lote hian hmasawnna an uaifual a ni a ti a, Hrangbana College zirlaiten a hun taka programme an tan thei chu lawmawm a tih thu a sawi bawk. 

Minister chuan Thianghlimna leh faina hi ram hmel a ni tih sawiin ram changkang kan sawi hian an fai, an thianghlim, kan ti thin a, hei hi kan ti ve thei tih sawiin faina leh thianghlimna chu nunpui turin a chah a, thalaiten midangte entawn nih a tul a, College tha ni turin thianghlimna leh faina ngaih pawimawh chu tehna pawimawh tak a ni a ti. 

Hrangbana College hian August 19-23,2019 chhungin College week an hmang a, zirlaite chu House 4-ah inthenin item chi hrang hrang hmangin an intihsiak a, a pumpuiah Green House an champion a. Best Girl-ah K.Ngaihpari, White House, Best Boy-ah Lalhmingmawia, White House te an thlang a ni. College Week kharnaah hian Principal leh faculty te, zirlai te an tel a ni.