Nizan khan East Tuipui Bialtu MLA Pu Ramthanmawia’n tui tla zawnna hmanrua -Lifejacket 15, mask 15, ngar hem aia len-pui kaihna tur satha hruizen quintal 2 leh kg 20 a rit, a vaiin cheng nuai hnih leh sing nga man hu chu Tuipuiral Group YMA hruaitute hnenah a hlan.

Pu Ramthanmawia chuan a bial chu Mizoram lui lian hmingthang pahnih Tuipui leh Tiau lui, Mizo tawng thumal leh thil hming - tuipuisuhlah, tiauvut, tiaulung, tiauhmi, tiauchhum leh a dang engemawzat lo pian chhuahna lui pawimawhin a hual thu a sawi a. Vanduaithlak takin heng lui pahnihah hian tui tla zawn a ngai thin a,  zawn ngai a lo awm leh a nih chuan heng an hmanraw dawnte hian khawtlang mipuite a tanpui ngei a beisei thu a sawi.

Tui tla zawnna hmanraw hlanna hunah hian bialtu MLA chuan a bial chhunga hmasawnna hna thawh hrang hrang a tarlang nghal a. Vaphai Tiau kaia suspension bridge dawh mek Assam Rifles-te nena inbiak rem a tul avanga chawlh lai lawk pawh Home Minister Pu Lalchamliana’n Assam Rifles hotu liante a dawr a, hnathawh chhunzawm leh theih thuai a beiseiawm thu a sawi. 

Tuitla zawnna hmanrua hi Pu Ramthanmawia hovin tukin August ni 29 khan Khawbungah thawn chhoh nghal a ni.