Vawiin hian Rulkual khaw kum 100 tlin lawmna (Centenary) chu Centenary Hall, Rulkualah hman a ni a, Minister of State, Pu C. Ngunlianchunga chu khuallian niin Centenary Lungphun a hawng a ni.

Centenary lawmna inkhawmah Pu Ngunlianchunga chuan, Rulkual khua chu khawtlang tangrual tak nia a hriat thu sawiin vawiin thlenga kohhran pakhat chauh awmna khua a ni thei hian chu chu a tichiang a ni, a ti a. Tanrualna kawngah hmasawn zel turin a fuih a ni. Ramngaw humhalh kawnga khawtlang tanrualna te, ei leh bara intodelh tura an beihna ropui a tih thu a sawi a, kum za zet tha taka an kal theihna kawnga sulsutu zawng zawngte a ngaihsan thu sawiin, vawiina khawtlang enkawltute pawhin kum za dang lo kal leh tur thlir chunga ro an rel theihnana tan la turin a fuih bawk.

Rulkual khua hi Mizo Lal hmingthang Dokulha fapa pahnihna, Tumir-a’n kum 1912 ah a din tana, a tirah tak chuan Rulkual ram tho Vanhne hmunah an awm hmasa a, kum 1915 atang khan tuna Rulkualah hian lutin 1929 Thing tamah khan Vanhneah bawk an let leh zawka, 1937 ah Rulkualah vek hian phei lehin vawiin thlengin mei a mitt a lo a ni. Vanhnea hi Rulkual lal ram chhunga hmun hming pakhat ve mai a ni a, heta an awm lai pawh hian Rulkual Lal tia hriat an ni reng tho a ni. Tunah hian In 84 awmin mihring 500 vel an cheng mek a ni.

Centenary lawmna inkhawm an hman zawh hnuin chawhnu dar 3:00 p.m atang khan khawtlangin ruai an thehnghal a, ruai buatsaih nan hian Sial, Bawng, Vawk, Kel, Ar leh Sangha te an buatsaih a ni.

Rulkual khaw kum 100 tlin lawmna hunah hian LADC MDC bialtu Pu V. Zirsanga chu khualzahawm a ni a, Rulkual khaw dintu Pu Tumir-a tupa, Pu Lalchunga Chinzah, Ex- MLA (Assam), Ex- CEM (PL Region & LADC) ni bawk chu Centenary Pa a ni a, Pu Lalchunga Chinzah nupui Pi Renchini chu Centenary Nu a ni bawk a. LADC a MDC sawm zetin he hun hi an hmanpui bawk a ni.