Rural Development Department chuan Sorkar laipui scheme pahnih Mahatma Gandhi National Rural Employment Guarantee Act (MGNREGA) leh Pradhan Mantri Awas Yojana (PMAY) chu district leh block hrang hranga kalpui anih dan thlirhona leh chak zawka hmalak zel theih dan tur sawihona hun vawiin khan Aijal Club Conference Hall-ah an nei.
Vawiin Review Meeting hi Pu Lalhmingthanga, Secretary, RD Department chuan kaihruaiin, district hrang hrang a hnathawh dan powerpoint presentation hmanga entir a ni a. Awmze nei zawk leh tha zawka heng Centrally Sponsored Scheme pahnih te hi kalpui anih theih nan ruahmanna hrang hrang siam a ni bawk. Vawiina ni za inhlawhna tia sawi thin MGNREGA chungchang presentation an pek zingah hian kum 2016-2017 chhunga hnathawh theih tur hrang hrangte, job card leh Aadhaar number thlunzawm chungchangte, MGNREGA hnuaia hna thawhte Geo-tagging hmanga chhinchhiah leh kum 2017-18 chhhung atan labour budget mamawh dan tur te a tel a.
PMAY (Housing for All) hnuaiah hian district tina in sak zawh zat leh beneficiary te hnena sum pek tawh dinhmun leh Bank hrang hrang nena inthlunzawm dan te sawiho a ni a. PMAY hi Sorkar laipuia Ministry of Housing and Urban Poverty Alleviation hnuaia kalpui a ni a, khawpui a cheng mi harsa chenna in mumal neilo ten mahni chenna tur in a neih theih nana hmalakna niin, kum 2015-2022 chhunga kalpui tur a duan a ni.
