Vawiin khan Mizoram State Rural Livelihoods Mission (MzSRLM), Rural Development Department hnuaia awm, State Bank of India (SBI) leh Mizoram Rural Bank (MRB) te chuan ‘Financial Inclusion’ ah thawhhona thuthlung (MoU) an ziak.
MoU hi MzSRLM aiawhin Pu Lalhmingthanga, Secretary, Rural Development Department, SBI aiawhin Pu Amitav Dutta, Regional Manager, SBI Aizawl leh MRB aiawhin Golap Basumatari, General Manager, MRB Head Office te’n Secretary Chamber, Rural Development, New Secretariat Complex, Aizawl ah an ziak a ni.
He MoU hian ‘Self Help Group (SHG) Bank Linkage Programme’ hmangin thingtlanga miretheite leh Bank-te inthlunzawm hi a tum ber chu a ni. SBI, MRB leh MzSRLM te thawhhona atang hian ‘SHG Bank Linkage’ chungchangah nasa lehzualin miretheite hriatna a tizau ang a; SHG kalphung te pawh thingtlang mite’n an hriat chian phah thei dawn a ni.
MoU hian thingtlang a mi harsa te SHG a inhlawmkhawm te chu, ei leh bar leh sumdawnna ah te tanpui an nih theihna turin bank loan, dose khat aia tam, interest hniam taka an lak theih nan, MzSRLM, SBI leh MRB-te hian hma an la dawn a ni.
MoU hian mi harsa zawk ten Bank atanga hamthatna an hmuh theih ang ang te awlsam zawk leh tlawm zawk a an hmuh theihna kawng siam sak chu a tum ber a ni a. National Rural Livelihoods Mission (NRLM) hnuaia SHG, bank loan la thei tur chuan tlawm zawk leh a punna hniam zawk a an lak theih nan; ‘interest subvention’ hmangin 7% in a tih tlawm theih dawn a ni. Hei bakah hian district thlan bikah chuan SHG te’n loan an rulh that dan a zirin 3% in tih tlawm belhchhah leh tur a ni. Hetiang a nih chuan bank loan pawh ‘interest subvention’ hmangin 4% thlenga tlawmin a lak theih dawn tihna a ni.
SHG member-ten sum leh paia hamthatna chungchang zirtirna (financial literacy) an neih neih theihna turin hma lak a ni bawk ang a; SHG te’n loan an lak ang ang pawh mumal taka hman a nih theih nan SHG te zirtirna (capacity building) pek tum a ni bawk a ni.
He thawhhona hmang hian Mizoram a miharsa zawkte’n retheihna atanga an chhuah theihnan leh retheihna umbo a, an nunphung a lo changkan lehzual theih nan hma an la thei dawn a ni.
