Ni thum awh tur District hrang hrang a Child Welfare Committee (CWC) member tharte pualin "State Level Orientation Training for Child Welfare Committee on The Juvenile Justice (Care & Protection of Children) Act, 2015" zirhona Mizoram State Child Protection Society (MSCPS) Training Hall-ah buatsaih chu vawiin khan neih tan niin, Pu PC Lalthanliana, Minister, Social Welfare Department in a hawng.
He training hawnna inkhawm tawi buatsaihah Pu PC Lalthanliana chuan sorkarin naupang te himna a ngaipawimawh a, a humhimtu tur leh an hmakhua sial saktu turin Integrated Child Protection Scheme (ICPS) pawh Mizoramah kum 2012 atang khan chaktakin kalpui zel a ni a ti a. Hei bakah hian Mizoram State Commission for Child Rights din turin sorkarin hma a la zel a ni a ti a. ICPS peng pakhat Child Welfare Committee (CWC) pawh district tinah din a ni tawh a, naupang chanhai leh enkawl ngai bikte humhim leh chanvo pek kawngah theihtawpin hma an la zel a ni a ti a. Minister chuan CWC member thar te chu naupang chaklo leh awmnem zawk, an chakloh vanga an aia chak leh thiltithei puitling ten kawng hrang hranga an ngaihthahna leh an dikna chanvo palzutna laka venghim theitu nihna chanvo pawimawh tak chelhtu an ni tih hria a, khawngaihna telin taima taka an hna hlen turin a chah a ni.
Training hawnna inkhawm hi Pi A.Vanlalzawni, Deputy Director, Social Welfare Department in kaihruaiin, inlawmna thusawi leh member te inhmelhriattirna a nei a. Training hi October 25-27, 2017 chhungin neih a ni anga, Child Welfare Committee tihtur leh mawhphurhna hrang hrang bakah ICPS chungchang inzirtirna hun neih a ni ang. Pu Laldinpuia Tlau, Jt.Registrar, Gauhati High Court, Aizawl Bench; Pi Sylvi Z. Ralte, Chief Judicial Magistrate, Kolasib District; Pi K.Lalremruati, Special Public Prosecutor (POCSO), Aizawl Judicial District te bakah State Child Protection Society a thawkten zirtirna an pe dawn a ni.
CWC hian a din tirh kum 2012 atangin tun September thla thleng hian naupang chanhai leh enkawl ngaibikte case 6537 chuang an khawih tawh a ni.
