2615/2022-2023
Aizawl the 11th November 2022 : Vawiin khan Aijal Club Conference Hall-ah Rural Development (RD) Department Minister Pu Lalruatkima hovin Rural Development Department officer ten Department chhunga peng hrang hrangte hnathawh thlirletna hun an hmang.

Rural Development Minister Pu Lalruatkima chuan he hunah fuihna thuchah sawiin Rural Development department chuan thingtlang tihhmasawnna tura hmalakna kan ngah em em a, chhungkaw lian tak thlawhma hrang hrang nei ang kan nih avang hian kan hnathawhte sawihona hun kan neih hi a pawimawh a, chak zawka hmalak a nih theih nan a tul anga scheme hrang hranga thawhho theih dan turte pawh hetianga thutkhawmna kan neih hian a hriatthiam theih thin a, a tangkai thin a ni, a ti a.

COVID-19 hripui leng kara RD Department hmalakna chi hrang hrangte a chhuanawmzia sawiin thingtlang lama kan unaute manganga an awm loh nan kan theih chinah ni 100 inhlawhna tha takin kan kalpui thei a, heng bakah hian RD department hnuaia hmalakna hrang hrang atangin thingtlang lo neitute chhawmdawl hna leh hmasawnna ruhrel hrang hrang kan kalpui thei hi thawktute inpekna a ni a ti a. Kawhhmuhsak hna hripui leng kara kan kalpui hi a ropui takzet a ni, tiin a sawi.

Minister chuan sawrkarin agency a neih theih tak loh avangin DRDA ni thin kha DRDO kan nei ta a, mi tam tak hnenah eizawnna nghet tam tak kan insiamsak thei hi a lawmawm a tih thu a tarlang a, hun rei tak atangin RD Block siam a har thu sawiin, Minister chuan tun sawrkarah Tlabung leh Kawrtethawveng RD Block neih thar a ni dawn a, Kawrtethawveng RD Block-ah post creation phalsak a nih thu leh Tlabung atan post creation buaipui mek a nih thu a tarlang bawk a. Minister chuan thla tharah chuan heng hmunah hian BDO Office hawn theih a nih a beisei thu a sawi bawk a ni.

Minister Lalruatkima chuan kan thlen chinah duhtawk mai lovin mipuite tan hnathawk zel turin leh block, district leh state level ah pawh an bial theuh te hrechianga, vah chhuah a ngaih hunah a tul anga a hmuna kal zel turin a chah a. Hmalakna hrang hranga hlawhtlinna hmel hmuh tur tam tak a awm chu lawmawm a tih thu sawiin RD Department hnuaia Officer zawng zawngte duhsakna a hlan nghal bawk a ni.

He hunah hian MGREGA, PMAY-G, SPMRM, BADP, PMKSY, SAGY, MzSRLM, SIRD & PR leh a dangte hnuai hmalakna hrang hrang sawiho leh thlirhona neih a ni a. Saitual District chhunga Project Director hmalakna pakhat, lo neih bansan a eizawnna nghelnghet an lo neih nana hmalakna "LET'S GROW" leh Zawlnuam RD Block a BDO hmalakna, "Best Practices on Moringa" chu chawhnu lamah ngaihthlak a ni ang.