Vawiin khan New Secretariat Conference Hall-ah Rural Development Minister Pu R. Lalzirliana, SEGC, MGNREGA Chairman ni bawk hovin State Employment Guarantee Council ten General Body Meeting an nei. Col. Z.S. Zuala, Parliamentary Secretary; Chief Secretary Pu Lalmalsawma, Department hrang hranga Secretary leh Department hotute bakah member te an kal tha hle.

Vawiina State Employment Guarantee Council thutkhawmah hian thu pawimawh tak tak (Agenda) 11 lai rel ho a ni a, meeting hmasaa hmachhawpte leh hmalak tawh dante thlir ho a ni. Pu R. Lalzirliana chuan SEGC leh MGNREGA ah hian Central lam hotute atangin thu thar hriat tur leh tih tur chi hrang hrang a lokal ve reng a, a taka hman nghal mai loh chi leh zir chian ngai te a awm thin a, kan ram mipui tana inmil leh samkhai zawk a her rem tul te pawh a awm tiin thu rel leh hmachhawp thenkhat te chu theih anga chaka bawhzui chi ni mahse meeting a sawi fel theih mai loh Planning leh Finance department hotu te nena sawiho ngai te a awm thin thu a sawi a. District tina Project Director leh a thawhpui ten hma an lak thatna ah hmasawnna hmuh tur a awm avanga lawmthu sawiin Job card pawh a nih na ang taka kalpui anih chhoh thu leh Job card neitute pawh district thenkhatah chuan an tlakhniam thu a sawi.

Kum 2015 - 2016 inkara SEGC leh MGNREGA atanga sum lo lut leh hman chhuah dan te vawiin meeting ah hian thlir ho a ni a. Bank account hmangin hnathawktu ten pawisa an lak tur chungchangah thu awmah chuan District thenkhatah Bank a that laiin thenkhatah Bank awm lohna khua te a awm thin a. Chungah chuan Bank kaltlanga sum tih chet a harsat avangin hemi kawnga hmalak zui zel dan tur kawng dap dan te sawiho a ni. District Schedule of Rates chungchang sawiho in MGNREGA te hian PWD Schedule of Rates hi an hmang thin a. Kawng thenkhatah PWD nen hnathawh in an lohna te a awm thin avangin a chhut chhuahna leh hnathawhna kawngah inmil theih lohna laite a awm thin a, chuvang chuan anmahni hman tura SOR duang turin Committee siam ni se an ti a. Heng bakah hian Social Audit leh hunbi neia veivah nan TA/DA te official te tan siam a lo ngai thin a, sum renchemna kawngah a tlem thei anga zinchhuahna siamin her rem theih nise tih te pawh sawiho a ni.