Rampum huapa faina kawnga hmalakna chi khat ‘Nation-wide Sanitation/Cleanliness Awareness Campaign’ chu Lunglei-ah pawh DC Office kawtah vawiin khan Swachh Bharat Mission(Gramin) enkawltu PHE Department huaihawtin neih a ni a. Kar 2 chhung awh tur he Awareness Campaign hi Lunglei DC Pu Ashish Madhaorao More, IAS-in a hawng.

Sanitation/Cleanliness Awareness Campaign Er.C.Lalzidinga, EE(Planning), PHED kaihhruaiah Lunglei DC Pu Ashish More chuan nikum India Hnampa Mahatma Gandhi pianchampha 2 Oct 2014-a rampuma hawn tak ‘Swachh Bharat Mission’ hman a nih tan atangin Lunglei District pawh faina kawngah nasa takin hma a sawn tih a hmuh thu a sawi a. A bik takin Lunglei District thlanglam khaw tam zawk sikulah ekin (toilet) an neih loh chu Sorkar hmalaknain zirlai hmeichhia leh mipate tan a hran ve vein pucca toilet sak sak vek a ni thei ta chu a lawmawm hle a ni, a ti. Lunglei khawpui chhung pawh fai sawta a hriat thu sawiin Pu Asish More chuan faina hi ni khat chhung chauha thawh chi ni lovin kan damchhung, kan nitin nuna bet tlat tur zawk a ni tiin kalkhawmte a fuih a. Hawnna inkhawma tel sikul naupang zirlaite chu ‘faina palai’ ah tang theuh tura sawmin mipuite faina kawngah zirtirtu leh hrilhhretu an ni thei a ni, a ti. Ramchhung hmun dangte nena tehkhin chuan Mizoram chu faina kawngah hma la tha bika a hriat thu tarlangin DC chuan tun dinhmun ai pawhin thlensan tum ila, rampum entawntlak ni turin i thawk theuh ang u, a ti.

Vawiin Campaign hawnna inkhawmah hian Er.J.Kapkima, EE PHED & Member-Secretary SBM(G) Lunglei chuan an hmalakna hrang hrang Report a pe a. Inthiarna fai leh thianghlim, tho bawm theih loh nei theuh tura hmalakna kal zelah Lunglei District-ah hian kum 2012 Baseline Survey-a landanah thingtlang khua zawng zawng belhkhawmin In 23,109 a awm a, chung zinga In 9,843 (42.59%) chuan ekin thianghlim an nei lo a. Kum 2015-2016 chhung hian In 3,272 tan ekin sak tum a ni, a ti a. Khawtlang leh kawtthlerte tihfai leh bawlhhlawh sawngbawl dan inzirtirna kawngah thingtlang khaw mipuite zirtir bakah khawtinah bawlhhlawh leh tuichhia sawngbawlna SBM(G) hnuaiah siam tum a ni bawk. Heng bakah hian SBM(G) hnuaiah thingtlang mipuite chu sahbawn hmanga kut silfai tulzia leh sil dan dik inzirtir te, naupang ek tho bawm theih loh tura ekina paih inzirtir te leh tui sawngbawl/khawlthat dan thianghlim inzirtir te chu PHE hmalakna pawimawh dangte a ni, a ti.

Rampum huapa faina leh thianghlimna beihpui thlakna ‘Nation-wide Sanitation/Cleanliness Campaign’ hi kuminah 25th September - 5th October, 2015 chhunga hman tur a ni a. Hemi chhunga ni pawimawh 2nd October (Gandhi Jayanti) hi a bik taka hman tur leh 15th October hian ‘Hand Washing Day’ hmang tura ruahman a nih bakah 31st October-ah he Campaign kharna urhsun taka hman a ni dawn bawk a. He Campaign-in a tum ber chu beihpui thlak a nih chhung hian faina chungchanga a tam thei ang bera hmalak leh inhrilhhriat a ni a; chumi hlawhtlinna atan mimal tin ten mahni In leh a vel, office, school, hospital, kawng leh kawtthler, market/bazar hmun, bus station/stop, lui leh kawr, Park, etc fai taka enkawl tur a ni a. Faina leh thianghlimna kawnga beihpui thlak turah hian sorkar hnathawkte, zirtirtu leh zirlaite, ASHA worker-te, NGO, Boys Scouts leh Girl Guides te chu midangte entawntlak tur khawpa thawk tura beisei an ni nghe nghe a. Swachh Bharat Mission-in a tum ber chu Mahatma Gandhi piancham vawi 150-na tur 2nd October, 2019 thlen hma ngeia rampum tih fai leh thianghlim a ni.

Cleanliness Campaign hawnna inkhawm neih zawhah 'Faina Rally' neih a ni nghal a. PHE Department hotute bakah Department hrang hrang officials te, Clean Lunglei Volunteer-te leh sikul naupang, NGO leh Media aiawhten Lunglei khawpui chhung fangin Faina Campaign Rally an nei a ni.