Vawiin khan Mizoram State Sports Council buatsaihin 8th Commonwealth Karate Championship, 2015-a Mizo infiammi medal late chawimawina hun MSSC Office, Coach Room-ah neih a ni a. Environment & Forests Minister Pu Lalrinmawia Ralte chu khuallian a ni.

Pu Lalrinmawia Ralte chuan Mizoram mai ni lo, India ram aiawha Karate inelna a medal late lawmpuina thu sawiin an thlen chinah duhtawk mai lova bul tan mek an nih inhriaa hmansawn zel tum turin a chah a. An tih tawh chu thlah lova hlawhtlinna ropui zawk chang tura bei zel turin a fuih a ni. An thlen chin apiangah hmasawn turin huaisenna leh tumruhna an neih a ngai tih sawiin Minister chuan beiseina nen hmalam thlirin thuawihna leh tawrhchhelna nei turin a chah a. Harsatna an tawk a nih chuan anmahni pui turin MSSC hotute an inhawng reng a ni, a ti bawk.

8th Commonwealth Karate Championship hi September 18 atanga 20 chhung khan New Delhi-ah neih a ni a. Hetah hian Mizoram atanga kalten gold medal pakhat leh silver medal pahnih an la a. Hmangaihsangpuia s/o JC Lalngurliana, Kawrtethawveng chuan Junior Male Kumite (Fight) 55kg hnuai lamah gold medal a la a. Lalrinsanga s/o Ralkapthanga, Phunchawng Veng chuan Junior Male Individual Kata (Basic Forms)-ah Silver Medal hawnin PC Vanlalruati d/o Lalbiakdika, Maubawk Veng chuan kum 21 hnuai lam Female Kumite (below 55kg)-ah silver medal a dawng bawk.

Mizoram State Sports Council Secretary Pu C.Laltlanthanga chuan medal late lawmpuina inkhawm hi a kaihruai a. All Mizoram Karate Association (AMKA) aiawhin Mizo zinga Karate 5th Dan hmasa ber leh awmchhun Pu C.Dosavunga’n thu a sawi a. Team Manager Pu TBC Hnuna leh Coach Hmingthangvunga te hnen atangin report ngaihthlak a ni bawk.